انٹرنیشنل ڈیسک: تھائی لینڈ اور کمبوڈیا کے درمیان سرحدی تنازعہ پیر کو خطرناک موڑ پر پہنچ گیا۔ تھائی فوج نے دعویٰ کیا کہ کمبوڈیا کے حملوں میں دو تھائی فوجی مارے گئے اور چار زخمی ہوئے، جس کے بعد تھائی فضائیہ نے لڑاکا طیارے تعینات کرکے کمبوڈیائی فوجی ڈھانچوں پر فضائی کارروائی شروع کی۔ تھائی آرمی کے ترجمان ونتھائی سوارے کے مطابق صبح 7 بجے نام یوئن ضلع کے چونگ بوک علاقے میں تھائی فوجیوں پر ”سپورٹنگ فائر ویپنز“ سے حملہ کیا ۔ اس سے پہلے صبح 5:05 بجے چونگ این ما علاقے میں بھی فائرنگ ہوئی، جس میں کمبوڈیا نے چھوٹے ہتھیاروں اور بالواسطہ اسلحے سے فائرنگ کی۔ تھائی فریق نے اسے ”رولز آف انگیجمنٹ“ کے تحت جوابی کارروائی قرار دیا۔
رائل تھائی ایئر فورس نے کہا کہ فوجیوں کی ہلاکت اور ”قومی سلامتی پر براہِ راست خطرے“ کے بعد فضائی حملے شروع کیے گئے۔ آر ٹی اے ایف کے ترجمان جککرت تھمماوچائی کے مطابق آپریشن کا مقصد کمبوڈیا کی فوجی صلاحیتوں کو کم سے کم سطح پر لانا ہے تاکہ شہریوں اور سرحد کی سلامتی یقینی بنائی جا سکے۔ دوسری جانب کمبوڈیائی وزارت دفاع کی ترجمان لیفٹیننٹ جنرل مالی سوچیٹا نے الزام لگایا کہ پیر کی صبح 5:04 بجے تھائی فوج نے ہی پہلے حملہ کیا، جس میں ٹینکوں سے تموآن تھوم مندر، 5 مکرا علاقے اور مشہور پریہ وہیار مندر کے آس پاس فائرنگ کی گئی۔
سوچیٹا نے کہا کہ کمبوڈیا نے پورے دن ”ایک بھی جوابی گولی“ نہیں چلائی اور بین الاقوامی قانون کے مطابق پرامن حل کی پالیسی پر قائم ہے۔ کمبوڈیا نے یہ معاملہ آسیان آبزرور ٹیم کو بھی بھیج دیا ہے اور تحقیق کا مطالبہ کرنے کی تیاری میں ہے۔ دونوں ملکوں کی فوج ایک دوسرے پر مسلسل ”اشتعال انگیزی“ اور ”پہلے حملہ“ کرنے کا الزام لگا رہی ہیں، جس سے جنوب مشرقی ایشیا میں بڑے فوجی تصادم کا خطرہ بڑھ گیا ہے۔