انٹر نیشنل ڈیسک : مشرقِ وسطیٰ میں کشیدگی اب ایسے موڑ پر پہنچ گئی ہے جہاں سے واپسی کا راستہ نظر نہیں آ رہا۔ امریکہ نے ایران کی سب سے حساس جگہ یعنی  ' خارگ آئلینڈ  ' (خارگ جزیرہ ) پر شدید بمباری کر کے دنیا کو حیران کر دیا ہے۔ صدر ڈونالڈ ٹرمپ نے اس حملے کی ایک سنسنی خیز ویڈیو شیئر کرتے ہوئے دعوی کیا ہے کہ امریکی فوج نے جزیرے پر موجود تمام ایرانی فوجی اڈوں کو مکمل طور پر تباہ کر دیا ہے۔ یہ حملہ اس لیے بھی تاریخی سمجھا جا رہا ہے کیونکہ گزشتہ کئی دہائیوں میں کئی امریکی صدور نے اس جزیرے کو چھونے تک کی ہمت نہیں کی تھی لیکن ٹرمپ نے براہِ راست حملہ کر کے اپنی حکمت عملی کی جارحانہ پالیسی واضح کر دی ہے۔

JUST IN: 🇺🇸🇮🇷 President Trump publishes video of the US military bombing Iran's Kharg Island. pic.twitter.com/Fnt1eH7JVm

— BRICS News (@BRICSinfo) March 14, 2026

دلچسپ بات یہ ہے کہ ٹرمپ نے ایک سوچا سمجھا قدم اٹھایا ہے۔ انہوں نے واضح کیا کہ انسانی اور اخلاقی بنیادوں پر انہوں نے فی الحال ایران کے تیل کے بنیادی ڈھانچے کو نشانہ نہیں بنایا بلکہ صرف فوجی چوکیوں کو تباہ کیا ہے۔ تاہم ان کی یہ نرمی ایک بڑی وارننگ کے ساتھ سامنے آئی ہے۔ ٹرمپ نے صاف الفاظ میں کہا ہے کہ اگر ایران نے آبنائے ہرمز میں جہازوں کا راستہ روکنے کی کوشش کی تو وہ تیل کے کنوں کو راکھ بنانے میں دیر نہیں کریں گے۔  تقریبا سوا منٹ کے اس حملے کی ویڈیو میں آسمان سے گرتے میزائل اور چاروں طرف اٹھتا دھواں جنگ کی ہولناکی کو صاف بیان کر رہا ہے۔
ایران کے لیے یہ حملہ ایک بڑی معاشی اور فوجی ضرب ہے۔ خارگ آئلینڈ وہ جگہ ہے جہاں ایران کے بڑے تیل کے میدانوں سے پائپ لائن کے ذریعے خام تیل پہنچتا ہے اور یہیں سے دنیا کو فراہم کیا جاتا ہے۔ حال ہی میں ایران نے یہاں سے ریکارڈ توڑ تیل کی برآمد شروع کی تھی جو معمول سے تین گنا زیادہ تھی لیکن امریکہ کی اس کارروائی نے ایران کے ارادوں پر پانی پھیر دیا ہے۔ جمی کارٹر سے لے کر رونالڈ ریگن تک جس حد کو کسی نے عبور نہیں کیا تھا آج امریکہ نے اسے پار کر کے ایران کو براہِ راست ہتھیار ڈالنے یا تباہی کے درمیان کھڑا کر دیا ہے۔ اب پوری دنیا کی نظریں ایران کے اگلے قدم پر لگی ہیں کہ آیا وہ پیچھے ہٹے گا یا خلیج میں بارود کی آگ مزید بھڑکے گی۔