واشنگٹن ڈی سی : آج سکھز آف امریکہ کے وفد نے چیئرمین جسدیپ سنگھ جسی کی قیادت میں دارالحکومت واشنگٹن ڈی سی میں واقع ایمبیسی کی ڈی سی ایم (ڈپٹی چیف آف مشن) میڈم مس نامیگیا خانپا سے ایک اہم ملاقات کی۔ اس وفد میں چیئرمین جسدیپ سنگھ جسی کے علاوہ کملجیت سنگھ سونی پردھان، بلجندر شمّی میت پردھان، ڈائریکٹر سکھپال سنگھ دھنوآ، ورندر سنگھ، گروِندر سیٹھی، اندر جیت سنگھ گجرال، کرن سنگھ، گرپریت سنگھ نکّی اور پربھجوت بترہ شامل تھے۔

یہاں قابل ذکر ہے کہ میڈم خانپا ابھی کچھ دن پہلے ہی نیروبی سے تبادلہ ہو کر یہاں آئی ہیں۔ اس موقع پر جسدیپ سنگھ جسی نے سکھوں کو بھارت میں درپیش مسائل اور جائز مطالبات سے متعلق آگاہ کیا۔ انہوں نے میڈم ڈی سی ایم کے ذریعے بھارت کے وزیر اعظم نریندر مودی کے لیے ایک درخواست بھی بھیجی کہ پنجاب کے سیلاب متاثرین کے لیے مزید راحت فنڈ جاری کیا جائے۔ میڈم خانپا نے وفد کے خیالات کو بہت ہی دھیان سے سنا اور ہر مسئلے کے حل کے لیے رضامندی ظاہر کی۔ انہوں نے اس موقع پر سکھز آف امریکہ کے وفد کے تمام اراکین کو معروف مصنف جناب ہربنس سنگھ کی کتاب 'دی ہیریٹیج آف دا سکھز' بھی پیش کی۔
اس ملاقات کے بعد جسدیپ سنگھ جسی نے بتایا کہ تبادلہ خیال بہت ہی خوشگوار ماحول میں ہوا اور اس ملاقات کے مثبت نتائج ضرور سامنے آئیں گے۔ انہوں نے بتایا کہ امریکہ اور بھارت کے موجودہ تعلقات پر بھی تبادلہ خیال کیا گیا۔ انہوں نے کہا کہ انہوں نے میڈم خانپا کو امریکہ آنے پر خوش آمدید کہا اور انہوں نے سکھز آف امریکہ کو ایمبیسی کے کسی بھی تعاون کے لیے پیشکش بھی کی ہے۔