لاہور: وزیرِخارجہ شاہ محمود قریشی کا کہنا ہے کہ بنگلہ دیش کی کرکٹ ٹیم پاکستان آنے کو تیار تھی، لگتا ہے بھارت کے دباؤ میں اس نے نہ آنے کا فیصلہ کیا ہے۔
ملتان میں صحافیوں سے گفتگو کرتے ہوئے وزیرِ خارجہ شاہ محمود قریشی نے کہا کہ اس وقت بھارت مکمل طور پر تقسیم نظر آ رہا ہے، بھارتی عوام سڑکوں پر ہیں۔
انہوں نے کہا کہ متنازعہ شہریت کے قانون کے خلاف بھارت بھر میں احتجاج ہو رہا ہے، دنیا بھر میں مودی سرکار کی ہندوتوا سوچ بے نقاب ہوگئی۔
شاہ محمود قریشی نے کہا کہ مقبوضہ کشمیر میں غیر انسانی کریک ڈاون ختم کرانے کے لئے سیاسی اور سفارتی محاذ پر جو کر سکتے ہیں وہ کر رہے ہیں۔
انہوں نے مزید کہا کہ کشمیریوں کے ردِعمل کا بھارت کو اندازہ نہ تھا، جو کشمیری رہنما ماضی میں بھارتی حکومت کے موقف کی تائید کرتے تھے وہ آج کنارہ کش ہیں۔
ایک سوال پر وزیر خارجہ نے کہا کہ حکومتِ پاکستان کی کوشش رہی ہے کہ مسلم ملکوں کے درمیان موجود غلط فہمیاں دور کرے۔