انٹرنیشنل ڈیسک: روس اور یوکرین کے درمیان تقریباً چار سال سے جاری جنگ اب جدید تاریخ کی سب سے خطرناک اور جان لیوا لڑائیوں میں شمار کی جا رہی ہے۔ ایک نئی امریکی رپورٹ نے اس جنگ کے ہولناک اعداد و شمار دنیا کے سامنے رکھ دیے ہیں۔ رپورٹ کے مطابق، فروری 2022  سے اب تک روس اور یوکرین کے مجموعی طور پر تقریباً بیس لاکھ فوجی ہلاک یا زخمی ہو چکے ہیں۔ یہ تعداد دوسری عالمی جنگ کے بعد کسی بھی جنگ میں ہونے والے نقصانات سے کہیں زیادہ ہے۔
سی ایس آئی ایس رپورٹ: روس کو سب سے زیادہ نقصان
امریکی تھنک ٹینک سینٹر فار اسٹریٹجک اینڈ انٹرنیشنل اسٹڈیز (Center for Strategic and International Studies)  (سی ایس آئی ایس ) کی رپورٹ میں بتایا گیا ہے کہ اس جنگ میں روس کو سب سے زیادہ فوجی نقصان اٹھانا پڑا ہے۔ روسی فوج کے تقریباً بارہ لاکھ اہلکار ہلاک یا زخمی ہوئے ہیں، جن میں سے لگ بھگ تین لاکھ 25 ہزار فوجی مارے گئے ہیں۔
رپورٹ میں یہ بھی کہا گیا ہے کہ اتنے بھاری نقصانات کے باوجود روس کی زمینی پیش قدمی نہایت سست رہی ہے۔ ماہرین کا کہنا ہے کہ دوسری عالمی جنگ کے بعد کسی بھی ملک نے اتنے زیادہ فوجی کھوئے ہوں اور اس کے باوجود زمین پر کوئی بڑی کامیابی حاصل نہ کی ہو۔
یوکرین کی صورت حال بھی تشویش ناک
یوکرین کو بھی اس جنگ میں شدید نقصان اٹھانا پڑا ہے۔ فروری 2022 سے دسمبر 2025 تک یوکرینی فوج کے تقریباً 5 سے چھ لاکھ اہلکار ہلاک یا زخمی ہوئے ہیں۔ ان میں سے تقریباً ایک لاکھ چودہ ہزار فوجیوں کی ہلاکت ہوئی ہے۔ یوکرین کے صدر وولادیمیر زیلنسکی نے فروری 2025 میں ایک امریکی چینل کو بتایا کہ جنگ میں ان کے ملک کے تقریباً 46 ہزار فوجی مارے گئے، لیکن ماہرین کا ماننا ہے کہ یہ تعداد اصل نقصانات سے کہیں کم ہو سکتی ہے۔ ہزاروں فوجی اب بھی لاپتہ ہیں یا جنگی قیدی بنے ہوئے ہیں۔
عام شہریوں پر بھی شدید اثر
اس جنگ کے اثرات صرف فوجیوں تک محدود نہیں رہے۔ اقوام متحدہ کے مطابق، سن 2025 میں یوکرین میں شہری ہلاکتوں کی تعداد سب سے زیادہ رہی۔ اقوام متحدہ کے اعداد و شمار کے مطابق، اس سال ڈھائی ہزار سے زیادہ شہری مارے گئے اور بارہ ہزار سے زائد افراد زخمی ہوئے۔ فروری 2022 سے اب تک تقریبا پندرہ ہزار شہریوں کی ہلاکت کی تصدیق ہو چکی ہے، جبکہ اصل تعداد اس سے کہیں زیادہ مانی جا رہی ہے۔