نئی دہلی: بی جے پی نے نربھیا اجتماعی عصمت دری اور قتل معاملے کے قصورواروں کو پھانسی دینے میں تاخیر کے لئے' آپ' کی دہلی حکومت کی لاپرواہی کو ذمہ دار ٹھہرایا اور کہا کہ اس معاملے میں موت کی سزا کے خلاف قصورواروں کی درخواست کو سپریم کورٹ کی طرف سے 2017 میں مسترد کئے جانے کے ڈھائی سال بعد بھی دہلی حکومت نے ان لوگوں کو نوٹس نہیں بھیجا۔
بی جے پی کے سینئر لیڈر اور مرکزی وزیر پرکاش جاوڈیکر نے صحافیوں سے کہا کہ سپریم کورٹ کے حکم کے ایک ہفتے کے اندر اندر تمام قصورواروں کو اگر' آپ 'حکومت نے نوٹس دے دیا ہوتا تو اب تک انہیں پھانسی ہو چکی ہوتی اور ملک کو انصاف مل چکا ہوتا۔
وہیں نربھیا اجتماعی عصمت دری اور قتل معاملے میں پٹیالہ ہاؤس کورٹ کی طرف سے جاری دیٹھ وارنٹ کے خلاف چار قصورواروں میں سے ایک مکیش کمار کی جانب سے دہلی ہائی کورٹ میں دائر درخواست پر سماعت ہوئی۔
اس دوران اے ایس جی اور دہلی حکومت نے ہائی کورٹ میں کہا کہ قصورواروں کو 22 جنوری کو پھانسی دینا مشکل ہوگا کیونکہ مجرم مکیش کی رحم کی درخواست پر صدر کے فیصلے کے بعد اسے 14 دن کا اور وقت دیا جائے گا۔ چاروں قصورواروں ونے شرما (26)، مکیش کمار (32)، اکشے کمار سنگھ (31) اور پون گپتا (25) کو 22 جنوری کو تہاڑ جیل میں صبح سات بجے پھانسی دئیے جانے کا اعلان کیا گیا تھا۔