نئی دہلی: ایشیا کے سب سے مصروف ہوائی اڈوں میں شمار ہونے والے ہانگ کانگ انٹرنیشنل ایئرپورٹ پر آج علی الصبح ایک بڑا حادثہ پیش آیا۔ متحدہ عرب امارات سے آنے والے ایک کارگو طیارے نے لینڈنگ کے وقت قابو کھو دیا اور رن وے سے پھسلتے ہوئے سمندر میں جا گرا۔ اس حادثے میں ایئرپورٹ کے گراؤنڈ  وہیکل میں سوار دو ملازمین دردناک موت کا شکار ہو گئے، جبکہ طیارے کے چار عملے کے ارکان زخمی ہوئے ہیں اور انہیں ہسپتال میں داخل کرایا گیا ہے۔
حادثہ کیسے پیش آیا؟
یہ حادثہ علی الصبح تقریبا 3:50 بجے پیش آیا، جب ترکی کا ایک بوئنگ 747 کارگو طیارہ ہانگ کانگ ایئرپورٹ پر لینڈنگ کی کوشش کر رہا تھا۔ فلائٹ EK9788، جو کہ ایمیریٹس اسکائی کارگو کے تحت یو اے ای کے المکتوم انٹرنیشنل ایئرپورٹ سے روانہ ہوئی تھی، رن وے پر اترتے وقت بے قابو ہو گئی اور پھسلتے ہوئے رن وے پار کر کے سمندر میں جا پہنچی۔ اگرچہ طیارے کا کچھ ہی حصہ پانی میں گیا، لیکن ٹکر اتنی شدید تھی کہ ایئرپورٹ پر موجود ایک سروس وہیکل اس کی زد میں آ گیا۔ اسی گاڑی میں بیٹھے دو ملازمین موقع پر ہی جاں بحق ہو گئے۔
ایمرجنسی ریسپانس اور ریسکیو آپریشن
حادثے کے فوراً  بعد ایئرپورٹ پر ہنگامی سروسز فعال ہو گئیں۔ بچاؤ  ٹیم نے تیزی سے کام کرتے ہوئے چار زخمی عملے کے ارکان کو بحفاظت باہر نکال لیا، جنہیں فوری طور پر ہسپتال پہنچایا گیا۔ مقامی پولیس اور سول ایوی ایشن ڈپارٹمنٹ کی ٹیمیں بھی موقع پر پہنچ گئیں اور حادثے کی تفتیش شروع کر دی گئی ہے۔

https://x.com/aviationbrk/status/1980035037358625245
رن وے بند، پروازوں پر اثر
حادثے کے بعد، ایئرپورٹ اتھارٹی نے فوری طور پر اس رن وے کو بند کر دیا جہاں یہ واقعہ پیش آیا تھا۔ فی الحال دو دیگر رن وے فعال ہیں، جن سے پروازوں کی آمد و رفت جاری ہے، لیکن تمام لینڈنگ اور ٹیک آف میں اضافی احتیاط برتی جا رہی ہے۔ ایئرپورٹ انتظامیہ نے یہ واضح کیا کہ کسی اور فلائٹ کے شیڈول پر براہ راست اثر نہیں پڑا ہے، لیکن چوکسی بڑھا دی گئی ہے۔
طیارہ اور ایئرلائن کی تفصیلات
طیارہ: بوئنگ 747
ایئرلائن: ایمیریٹس اسکائی کارگو
فلائٹ نمبر: EK9788
پرواز کا راستہ: المکتوم انٹرنیشنل ایئرپورٹ (یو اے ای)ہانگ کانگ
حادثے میں جانی نقصان: 2 ہلاک، 4 زخمی (عملے کے رکن) 
تحقیقات کا آغاز، ایئرلائن سے رابطے میں انتظامیہ
ہانگ کانگ کے سول ایوی ایشن ڈپارٹمنٹ نے اطلاع دی ہے کہ حادثے کی گہرائی سے تفتیش کی جا رہی ہے اور متعلقہ ایئرلائن اور دیگر ایجنسیوں سے مسلسل رابطہ قائم ہے۔ ابتدائی اندازے میں تکنیکی خرابی یا موسم سے جڑی کوئی وجہ سامنے آ سکتی ہے، لیکن اس کی تصدیق تحقیق کے بعد ہی ممکن ہو سکے گی۔