اسلام آباد: پاکستان کے وزیر خارجہ اسحاق ڈار نے بدھ کے روز کہا کہ نئی دہلی اور اسلام آباد کے درمیان دوبارہ فوجی تصادم کے امکانات کم ہیں۔ تاہم، انہوں نے یہ بھی کہا کہ پاکستان ایسی کسی بھی صورتحال (فوجی تنازعہ) میں منہ توڑ جواب دے گا۔ ڈار نے یہ تبصرہ یہاں ایک پریس کانفرنس میں ایک سوال کے جواب میں کیا۔ پریس کانفرنس کا اہتمام وزیر اعظم شہباز شریف کے حالیہ دورہ ترکی، ایران، آذربائیجان اور تاجکستان کے بارے میں میڈیا کو بریفنگ دینے اور پہلگام حملے کے بعد ہندوستان  کے ساتھ جنگ میں تعاون پر متعلقہ ممالک کی قیادت کا شکریہ ادا کرنے کے لیے کیا گیا تھا۔ ہندوستان کے ساتھ نئے تنازع کے امکان کے بارے میں پوچھے جانے پر ڈار نے کہا کہ وہ مستقبل کی پیشین گوئی نہیں کر سکتے لیکن ایسی کسی بھی صورتحال کا امکان بہت کم ہے۔
وزیر نے کہا کہ جنگ بندی برقرار ہے اور دونوں فریقوں نے فوجیوں کی واپسی سے جڑے تمام اقدامات کو صحیح معنوں میں نافذ کر دیا ہے۔ اس لیے میری رائے میں(نئے سرے سے تنازع ہونے کا )کوئی امکان نہیں ہے۔تاہم، انہوں نے کہا کہ اگر  ہندوستان نے فوجی تنازعہ کا سہارا لیا، تو ہم مناسب جواب دیں گے۔ ڈار نے کہا کہ پاکستان ہندوستان  کے ساتھ مذاکرات کے لیے تیار ہے لیکن اس کے لیے بیتاب نہیں ہے۔ انہوں نے کہا کہ پاکستان ایک جامع مذاکرات چاہتا ہے جس میں دہشت گردی کے ساتھ ساتھ سندھ طاس معاہدہ (IWT) سمیت دیگر مسائل بھی شامل ہوں۔ ڈار نے دعوی کیا کہ آئی ڈبلیو ٹی کو ملتوی نہیں کیا جا سکتا۔ جموں و کشمیر کے پہلگام میں 22 اپریل کو دہشت گردانہ حملے کے بعد  ہندوستان نے سندھ طاس معاہدہ معطل کرنے سمیت دیگر اقدامات کا اعلان کیا تھا۔ پاکستان اور ہندوستان  کے درمیان آبی تنازعات کو حل کرنے اور سندھ طاس کے چھ بڑے دریاؤں کے پانی کو بانٹنے کے لیے 1960 میں سندھ طاس معاہدے پر دستخط کیے گئے تھے۔
ڈار نے پہلگام حملے کی غیر جانبدارانہ تحقیقات کے لیے اپنی پیشکش کا اعادہ کیا، جس کی وجہ سے پاکستان اور ہندوستان کے درمیان حالیہ فوجی تنازعہ پیدا ہوا۔ انہوں نے دعوی کیا کہ پاکستان کی فوجی کارروائی کو سراہا گیا اور اس کی سفارتی کوششوں کو بین الاقوامی سطح پر بھی سراہا گیا۔ وزیر نے تنازع کے دوران اور امن کی بحالی میں امریکہ، برطانیہ، سعودی عرب، متحدہ عرب امارات (یو اے ای)، قطر، ایران اور دیگر ممالک کے کردار کی بھی تعریف کی۔ 
انہوں نے کہا کہ وزیراعظم نواز شریف آئندہ 24 گھنٹوں میں سعودی عرب کا دورہ کریں گے تاکہ ہندوستان  کے ساتھ کشیدگی کے دوران مثبت کردار ادا کرنے پر سعودی قیادت کا شکریہ ادا کیا جا سکے۔ شریف کے حالیہ چار ملکی دورے کا حوالہ دیتے ہوئے ڈار نے کہا کہ وزیر اعظم نے ہندوستان کے ساتھ تنازع کے دوران ترکی، ایران، آذربائیجان اور تاجکستان کی طرف سے اظہار یکجہتی کے لیے اظہار تشکر کے لیے ان ممالک کا دورہ کیا۔