انٹرنیشنل ڈیسک: نیدرلینڈ میں نئی اتحادی حکومت نے باضابطہ طور پر حلف اٹھا لیا ہے۔ ملک کے سب سے کم عمر وزیرِ اعظم کے طور پر روب جیٹن نے عہدہ سنبھال لیا۔ یہ نئی حکومت کئی جماعتوں کے اتحاد سے بنی ہے اور سیاسی استحکام اور اتفاق رائے کی نئی شروعات کا اشارہ دیتی ہے۔ گزشتہ چند برسوں میں ڈچ پارلیمنٹ میں دھڑے بندی اور سیاسی کھینچا تانی دیکھنے میں آئی تھی جس سے فیصلہ سازی کا عمل متاثر ہوا تھا۔ وزیرِ اعظم جیٹن نے اشارہ دیا ہے کہ ان کی ترجیح پارلیمنٹ میں تعاون اور اتفاق رائے کا ماحول قائم کرنا ہوگا۔ وہ ملک کے اندر سیاسی توازن قائم کرنے کے ساتھ ساتھ بین الاقوامی سطح پر نیدرلینڈ کی مضبوط حیثیت بحال کرنا چاہتے ہیں۔
نئی حکومت کا مقصد یورپی یونین میں نیدرلینڈز کے بااثر کردار کو دوبارہ قائم کرنا ہے۔ جیٹن نے کہا ہے کہ وہ یورپی تعاون کو مضبوط بنانے کے لیے جلد اپنے ہم منصب رہنماو¿ں سے بات کریں گے۔ حکومت نے واضح کیا ہے کہ روس کے خلاف جنگ لڑ رہے یوکرین کو ڈچ حمایت جاری رہے گی۔ یہ حمایت سیاسی، معاشی اور دفاعی تعاون کی صورت میں برقرار رہے گی۔ نئی کابینہ میں مختلف اتحادی جماعتوں کو نمائندگی دی گئی ہے۔ خارجہ پالیسی، دفاع اور مالیات جیسے اہم وزارتوں کی ذمہ داری تجربہ کار رہنماو¿ں کو سونپی گئی ہے تاکہ داخلی اور بین الاقوامی چیلنجز کا متوازن طریقے سے سامنا کیا جا سکے۔
کون ہیں روب جیٹن۔
روب جیٹن ڈیموکریٹس 66 پارٹی سے وابستہ ہیں اور پہلے موسمیاتی اور توانائی کے وزیر رہ چکے ہیں۔ یورپی تعاون، سبز پالیسیوں اور اتفاق رائے کی سیاست ان کے اہم ایجنڈے ہیں۔ وہ یوکرین کی حمایت اور مضبوط یورپی یونین کے کردار کے حامی ہیں۔ روب جیٹن نیدرلینڈز کے ایک اہم لبرل رہنما ہیں جنہوں نے کم عمری میں ہی قومی سیاست میں بڑی پہچان بنائی۔ روب جیٹن کی پیدائش 1987 میں ہوئی۔ انہوں نے پبلک ایڈمنسٹریشن کی تعلیم حاصل کی اور طالب علمی کے زمانے سے ہی سیاست میں سرگرم رہے۔ روب جیٹن کی قیادت میں قائم ہونے والی یہ حکومت ڈچ سیاست میں نسلی تبدیلی کی علامت سمجھی جا رہی ہے۔ نوجوان قیادت، یورپی تعاون پر زور اور عالمی مسائل پر فعال مو¿قف کے ذریعے نیدرلینڈز آنے والے برسوں میں اپنی بین الاقوامی حیثیت مضبوط کرنے کی کوشش کرے گا۔