نئی دہلی :دہلی میں شہریت ترمیمی قانون ( سی اے اے )کو لے کر ہنگامہ  ہو گیا ہے۔  سی اے ے  کے حمایتی اور اس کے مخالفین میں پر تشدد جھڑپ ہوگئی ہے ۔ دونوں فریقین کے درمیان پتھراؤ ہوا اور کئی گاڑیوں  کو نذر آتش کیا گیا ۔اس دوران زخمی ہوئے ایک ہیڈ کانسٹیبل کی موت ہو گئی۔ 

شہریت ترمیمی قانون کی مخالفت اور موافقت کرنے والوں میں ایک دوسرے پر پتھرا ؤکے واقعات کے دوران جعفرآباد اور موج پور علاقوں میں کم سے کم دو مکانات اور ایک دمکل گاڑی کو آگ لگا دینے کی اطلاع ملی ہے۔ وہیں، شاہدرہ کے ڈی سی پی امت شرما کے بھی زخمی ہونے کی خبر ہے۔فی الحال جعفرآباد، موجپورچاند باغ، بھجن پورہ ، راول شہر میں کشیدگی کی صورتحال بنی ہوئی ہے۔

 سی اے اے کو لے کر دارالحکومت میں بھڑکے تشدد میں تقریبا ً10  مظاہرین زخمی ہوئے ہیں، ان  کا  علاج جی ٹی بی ہسپتال میں چل رہا ہے۔وہیں، نجی ہسپتال میں داخل 6  پولیس والوں میں سے 2 کو چھٹی دے دی گئی ہے، جبکہ 2 کی حالت نازک اور  2 کا علاج  چل رہا ہے۔