سری نگر/جموں: جموں و کشمیر کے نائب گورنر منوج سنہا جمعہ کو بھگوان بودھ کی مقدس باقیات حاصل کرنے کے لیے روس پہنچ گئے ہیں۔ وہاں ان کا بھارتی حکام اور روسی حکام کی طرف سے استقبال کیا گیا۔ نائب گورنر منوج سنہا جمعرات کی دیر رات ایک وفد کی قیادت کرتے ہوئے روس روانہ ہوئے تھے۔
سوشل میڈیا ایکس پر پوسٹ شیئر کرتے ہوئے نائب گورنر منوج سنہا نے کہا کہ وہ روس کے الیسٹا، کالماکیا پہنچ گئے ہیں۔ یہاں انہیں بھگوان بودھ کی مقدس باقیات کا آشیرباد حاصل ہوگا۔ نائب گورنر نے مزید کہا کہ وہ باتو سارگیویچ خاصیکوف، ریپبلک کالماکیا کے سربراہ کے ساتھ بات چیت کریں گے۔ اس کے ساتھ وہ کالماکیا کے بودھ مذہب کے سربراہ شازن لاما، سربراہ لاما اور مقامی عقیدت مندوں سے بھی گفتگو کریں گے۔

روس پہنچے وفد کی نمائندگی نائب گورنر منوج سنہا کر رہے ہیں اور الیسٹا، کالماکیا میں ایک ہفتے تک جاری رہنے والی نمائش میں حصہ لیں گے اور بھگوان بودھ کی مقدس باقیات کو واپس بھارت لے کر آئیں گے۔ قابل ذکر ہے کہ نائب گورنر منوج سنہا نے جمعرات کی دیر رات اپنے روسی دورے کے بارے میں سوشل میڈیا پوسٹ پر معلومات شیئر کی تھیں کہ وہ بھگوان بودھ کی مقدس باقیات واپس بھارت لانے والے وفد کی قیادت کر رہے ہیں اور اس مقدس کام کا موقع فراہم کرنے پر انہوں نے وزیر اعظم نریندر مودی کا شکریہ ادا کیا تھا۔