نیویارک: امریکی وزیر دفاع پیٹ ہگیسیتھ کی جانب سے صحافیوں پر لگائی گئی نئی پابندیوں کو قبول نہ کرتے ہوئے کئی صحافیوں نے بدھ کو 'ایکسیس بیج' (پینٹاگون کے لیے مجاز داخلہ کارڈ) واپس کر دیے اور پینٹاگون (امریکی محکمہ دفاع کا مرکزی دفتر) سے باہر چلے گئے۔ نیوز تنظیموں نے وزیر دفاع کی جانب سے نافذ کیے گئے نئے قواعد کو تقریباً اتفاق رائے کے ساتھ مسترد کر دیا ہے۔ ان قواعد کے تحت، صحافیوں کو ہگیسیتھ کی منظوری کے بغیر کسی بھی معلومات کی رپورٹنگ کے لیے پینٹاگون سے نکالا جا سکتا ہے، چاہے وہ معلومات خفیہ ہو یا نہ ہو۔ شام 4 بجے کے وقت کی حد سے پہلے، صحافیوں نے اجتماعی طور پر پینٹاگون خالی کر دیا۔ تقریباً 40-50 صحافیوں نے ایک ساتھ اپنے بیجز جمع کروائے اور اپنا سامان لے کر چلے گئے۔
دی اٹلانٹک کی رپورٹر نینسی یوسف نے کہایہ افسوسناک ہے، لیکن مجھے فخر ہے کہ پریس برادری متحد تھی۔ یہ ابھی واضح نہیں ہے کہ نئے قواعد کا عملی اثر کیا ہوگا۔ تاہم، نیوز تنظیموں نے فوج کی مضبوط اور وسیع کوریج جاری رکھنے کا وعدہ کیا ہے۔ امریکی صدر ڈونالڈ ٹرمپ نے ان قواعد کی حمایت کرتے ہوئے کہا ہے کہ پریس بہت مداخلتی اور بے ایمان ہے۔
'پینٹاگون پریس ایسوسی ایشن' اور تقریباً تمام بڑے میڈیا اداروں 'ایسوسی ایٹڈ پریس'، 'نیو یارک ٹائمز'، 'فاکس' اور 'نیوزمیکس' نے ان قواعد کو مسترد کر دیا ہے۔ اس ایسوسی ایشن میں 101 اراکین ہیں جو 56 نیوز تنظیموں کی نمائندگی کرتے ہیں۔ صرف 'ون امریکہ نیوز نیٹ ورک' نے ٹرمپ انتظامیہ کے ساتھ قریبی تعلقات کی امید میں ان پر دستخط کیے ہیں۔