نیشنل ڈیسک: جواہر لال نہرو یونیورسٹی (جے این یو)میں بدھ کی رات 'آئی لو محمد' لکھے نعرے اور پوسٹر ملنے سے کیمپس میں ہلچل مچ گئی۔ یونیورسٹی کے کئی حصوں کی دیواروں پر یہ نعرے لکھے ہوئے پائے گئے۔ کسی بھی قسم کا تنازع نہ بڑھے، اس کے لیے انہیں راتوں رات ہٹا دیا گیا۔ فی الحال یونیورسٹی کے سکیورٹی افسران معاملے کی جانچ کر رہے ہیں اور مجرموں کا پتہ لگانے کی کوشش میں مصروف ہیں۔
یہ نعرہ حالیہ ہفتوں میں ملک کے کئی حصوں میں تنازعات کا مرکز رہا ہے۔ حکام کا کہنا ہے کہ جے این یو جیسے معزز ادارے میں اس طرح کے پوسٹر ملنا سنگین معاملہ ہے، خاص طور پر جب یونیورسٹی کے طلبہ یونین(جے این یو ایس یو)کے انتخابات 4 نومبر کو ہونے والے ہیں۔ اس واقعے کے بعد کیمپس میں کشیدگی پھیلنے کا خدشہ ظاہر کیا جا رہا ہے۔
جے این یو ایس یو کے صدر ویبھو مینا(اے بی وی پی)نے کہا کہ یونیورسٹی کے کیمپس میں ایسے نعرے نہیں لکھے جانے چاہئیں۔ ان نعروں نے کئی ریاستوں میں تشدد اور احتجاجی مظاہروں کو جنم دیا ہے۔ مذہبی اظہار کی آزادی کا احترام کیا جانا چاہیے، لیکن اگر کسی چیز سے سماجی ہم آہنگی خراب ہونے کا خدشہ ہو تو اسے عوامی مقامات، خاص طور پر یونیورسٹیوں میں نہیں لگایا جانا چاہیے۔ 
 بھارتیہ ویدیارتھی پریش (اے بی وی پی)کی جے این یو یونٹ نے اس واقعے کی سخت مذمت کی ہے۔ تنظیم نے کہا کہ "جے این یو جیسے متنوع ثقافت والے ادارے کو فرقہ وارانہ رنگ دینے کی کوشش کی گئی ہے۔ اس عمل نے نہ صرف یونیورسٹی کی قومی شہرت کو دھندلا کیا ہے بلکہ کیمپس کے پرامن ماحول کو بھی متاثر کیا ہے' ۔
یونیورسٹی انتظامیہ سنجیدہ
دریں اثنا، اس واقعے پر بائیں بازو کے طلبہ تنظیموں کی جانب سے کوئی سرکاری ردعمل نہیں آیا ہے۔ یونیورسٹی انتظامیہ نے معاملے کو سنجیدگی سے لیتے ہوئے سکیورٹی انتظامات سخت کر دیے ہیں اور طلبہ سے امن قائم رکھنے کی اپیل کی ہے۔ انتظامیہ کا کہنا ہے کہ مجرموں کی شناخت کر کے ان کے خلاف سخت کارروائی کی جائے گی۔