ٹوکیو: جاپان کی سیاست سے اس وقت کی بڑی خبر سامنے آ رہی ہے۔ جاپان کی پہلی خاتون وزیر اعظم سانے تاکائچی نے جمعہ کو پارلیمنٹ کے ایوان زیریں کو تحلیل کر دیا ہے۔ اس فیصلے کے ساتھ ملک میں 8 فروری کو وسط مدتی انتخابات کرانے کا راستہ صاف ہو گیا ہے۔ تاکائچی نے یہ قدم اقتدار سنبھالنے کے محض تین ماہ کے اندر ہی اٹھایا ہے۔اکتوبر میں وزیر اعظم بننے والی تاکائچی کی مقبولیت اس وقت عروج پر ہے۔ ایک سروے کے مطابق انہیں 70 فیصد عوام کی حمایت حاصل ہے۔ ماہرین کا ماننا ہے کہ تاکائچی اپنی اس مضبوط پوزیشن کا فائدہ اٹھاتے ہوئے حکمراں لبرل ڈیموکریٹک پارٹی کی حیثیت کو مزید مضبوط کرنا چاہتی ہیں، تاکہ گزشتہ برسوں میں ہونے والے سیاسی نقصان کی تلافی کی جا سکے۔
وزیر اعظم تاکائچی کے اس فیصلے کا اثر بین الاقوامی سطح پر بھی دیکھنے کو ملے گا۔ تائیوان کی حمایت میں دیے گئے بیانات کے باعث چین کے ساتھ جاپان کی کشیدگی بڑھ رہی ہے۔ دوسری جانب امریکی صدر ڈونالڈ ٹرمپ کی طرف سے جاپان پر ہتھیاروں پر خرچ بڑھانے کے لیے مسلسل دباو¿ ڈالا جا رہا ہے۔ ایسی صورتحال میں تاکائچی انتخابات جیت کر ایک مضبوط رہنما کے طور پر ابھرنا چاہتی ہیں۔
پارلیمنٹ کے تحلیل ہونے سے جاپان کے اس بجٹ پر ووٹنگ ملتوی ہو گئی ہے، جس کا مقصد ملک کی لڑکھڑاتی معیشت کو رفتار دینا اور بڑھتی ہوئی مہنگائی پر قابو پانا تھا۔ اب ملک کی عوام فیصلہ کرے گی کہ وہ تاکائچی کے فیصلوں پر مہر لگاتی ہے یا نہیں۔ ایوان کی تحلیل کے بعد اب 12 دن کی انتخابی مہم باضابطہ طور پر منگل سے شروع ہوگی۔ یہ انتخابات تاکائچی کے سیاسی مستقبل اور جاپان کی معاشی اور خارجہ پالیسی کے لیے نہایت اہم سمجھے جا رہے ہیں۔