انٹرنیشنل ڈیسک: معاشی چیلنجز اور بحران کے مرحلے سے نکلنے کی کوشش  کر رہا  سری لنکا اب سیاحت کے محاذ پر راحت محسوس کر رہا ہے۔ جولائی 2025 میں کل 2,00,244 بین الاقوامی سیاح سری لنکا پہنچے، جن میں ہندوستانی سیاحوں کی تعداد سب سے زیادہ تھی۔ یہ جانکاری  سری لنکا ٹورازم ڈیولپمنٹ اتھارٹی (SLTDA) کے تازہ ترین اعداد و شمار سے سامنے آئی ہیں۔ مقامی نیوز پورٹل ادا دیرانا کے مطابق جولائی 2024 کے مقابلے اس سال جولائی میں سیاحوں کی تعداد میں 6.6 فیصد اضافہ ہوا ہے۔
اعداد و شمار کے مطابق صرف ہندوستان  سے 37,128 سیاح سری لنکا پہنچے جو کل تعداد کا تقریبا 18.5 فیصد ہے۔ اس کے بعد برطانیہ دوسرے نمبر پر رہا جہاں سے 23,475 سیاح سری لنکا گھومنے آئے ۔ اس کے علاوہ نیدرلینڈ سے 15,556، چین سے 12,982 اور فرانس سے 11,059 سیاح آئے۔ 
7 ماہ میں 13 لاکھ سے زائد سیاح
ٹورازم ڈیولپمنٹ اتھارٹی کے مطابق جنوری سے جولائی 2025 کے درمیان کل 13,68,288 سیاح سری لنکا پہنچے ہیں، اس میں ہندوستان نے بھی سب سے زیادہ حصہ ڈالا ہے۔ اس دوران 2,79,122 ہندوستانی سیاح سری لنکا گھومنے ۔ وہیں،  روس سے 1,31,377 اور برطانیہ سے 1,15,470 سیاح آئے ہیں۔ کولمبو میں ہوٹل مالکان اور مقامی تاجروں کا کہنا ہے کہ ہندوستانی سیاحوں کی آمد  سے سری لنکا کی مشکلات سے جوجھ رہی معیشت کو سہارا مل رہا ہے ۔  خاص طور پر ایسے وقت میں جب سری لنکا غیر ملکی زرمبادلہ کے بحران سے نبرد آزما ہے اور سیاحت اس کا ایک بڑا ذریعہ بنی ہوئی ہے۔
سری لنکا کا انحصار سیاحت پر کیوں ہے؟
گزشتہ چند سالوں میں سری لنکا کو معاشی بحران، غیر ملکی قرض، ایندھن کی قلت اور سیاسی عدم استحکام جیسے کئی چیلنجز کا سامنا کرنا پڑا ہے۔ ان سب کے باوجود سری لنکا کے لیے غیر ملکی زرمبادلہ کمانے کا بنیادی ذریعہ سیاحت ہی ہے۔ سری لنکا کی حکومت اور ہوٹل انڈسٹری ہندوستانی سیاحوں کی مسلسل بڑھتی ہوئی آمد کو ایک مثبت علامت سمجھ رہی ہے۔