نئی دہلی : ہندوستانی کپتان وراٹ کوہلی اور تیز گیند باز جسپریت بمرا نے سال 2019 کا اختتام ونڈے کرکٹ رینکنگ میں نمبر 1 کے طور پر کیا ہے ۔ ہندوستان اور ویسٹ انڈیز کے درمیان تین میچوں کی سیریز کے دوران بمرا بھلے ہی نہیں کھیلے لیکن وہ اپنی گذشتہ کارکردگیوں کی وجہ سے ہی پہلے نمبر بنے ہوئے ہیں ۔ بمراہ زخمی ہونے کے باعث یہ سیریز نہیں کھیل پائے تھے ۔
وراٹ نے کٹک میں 85 رنوں کی شاندار اننگ کھیلی اور ہندوستان کو 3 میچوں کی سیریز میں 2-1 سے جیت دلائی ۔ وراٹ نمبر ایک پر تو بر قرار رہے لیکن دوسرے میچ میں صفر پر آؤٹ ہونے کا انہیں رینکنگ میں تھوڑا نقصان اٹھانا پڑا ۔ وراٹ 895 پوائنٹس سے کھسک کر 887 رینکنگ پوائنٹس پر آگئے ہیں ۔
ہندوستانی نائب کپتان روہت شرما بھی دوسرے پائیدان پر قابض ہیں ، انہوں نے بھی ونڈیز کے خلاف بہترین کارکردگی کے ذریعے 'مین آف دی سیریز' رہے ۔ انہوں نے اپنے رینکنگ پوائنٹس میں سدھار کیا ہے ۔ روہت 863 پوائنٹس سے 14 رینکنگ پوائنٹس کی چھلانگ لگا کر 873 پوائنٹس پر پہنچ گئے ہیں اور اپنی بہترین رینکنگ سے صرف 12 پوائنٹس دور رہ گئے ہیں ۔