انٹرنیشنل ڈیسک :ہیتی کی سیاست ایک بار پھر ابل رہی ہے اور اس بار امریکہ نے کھلی وارننگ دے کر ماحول اور سخت کر دیا ہے۔ واشنگٹن نے صاف الفاظ میں کہا ہے کہ اگر اقتدار میں بیٹھے لوگ ملک کو مزید غیر مستحکم کرنے کی کوشش کریں گے، تو امریکہ خاموش نہیں بیٹھے گا۔امریکہ نے ہیتی کی عبوری صداراتی کونسل کو خبردار کیا ہے کہ وہ موجودہ حکومت کے ڈھانچے میں کسی بھی قسم کی تبدیلی نہ کرے۔ ہیتی میں امریکی سفارتخانے نے سوشل میڈیا پر جاری بیان میں کہا کہ غیر منتخب کونسل اگر اپنے دورِ کار کے آخری مرحلے میں حکومت کو بدلنے کی کوشش کرتی ہے، تو اسے ملک کی سلامتی اور استحکام کے خلاف سمجھا جائے گا اور ایسا قدم قابل قبول نہیں ہوگا۔امریکی سفارتخانے نے یہ بھی واضح کیا کہ جو لوگ ایسے پہلوں کی حمایت کریں گے جو گروہوںکے مفادات کو آگے بڑھاتی ہیں، وہ نہ صرف ہیتی بلکہ پورے خطے اور امریکہ کے مفادات کے خلاف کام کریں گے۔ ایسے معاملات میں امریکہ “مناسب کارروائی” کرنے سے پیچھے نہیں ہٹے گا۔یہ وارننگ ایسے وقت میں آئی ہے جب عبوری کونسل کے بعض ارکان اور موجودہ وزیر اعظم الیکس ڈیڈیئر فلز-ایمی کے درمیان اختلافات کی خبریں سامنے آ رہی ہیں۔ حالانکہ ان اختلافات کی وجہ عوامی طور پر واضح نہیں کی گئی ہے۔
امریکی محکمہ خارجہ کے ویسٹرن ہیمسفیر بیورو نے بھی سخت بیان دیتے ہوئے کہا کہ ہیتی کی پرانی غیر مستحکم صورتحال کے پیچھے بدعنوان سیاستدانوں کا کردار رہا ہے، جوگروہوں کا استعمال افراتفری پھیلانے کے لیے کرتے ہیں اور پھر اسی افراتفری کو قابو کرنے کے نام پر اقتدار پر قبضہ کرنے کی کوشش کرتے ہیں۔ محکمہ نے کہا کہ حقیقی استحکام صرف ووٹروں کی حمایت سے آئے گا، نہ کہ تشدد اور خوف کے ذریعے۔ بیان میں یہاں تک کہا گیا کہ جو کونسل کے ارکان اس راستے پر چل رہے ہیں، وہ محب وطن نہیں بلکہ گروہوں کے ساتھ سازباز کرنے والے لوگ ہیں۔اس پورے واقعے پر ہیتی کے دفترِ وزیر اعظم نے کوئی بھی تبصرہ کرنے سے انکار کر دیا ہے۔ جبکہ کونسل کے سربراہ لارینٹ سینٹ-سیر نے بیان جاری کر کے کہا کہ وہ 7 فروری سے پہلے حکومت کے استحکام کو کمزور کرنے والے کسی بھی قدم کے خلاف ہیں۔ ان کا کہنا ہے کہ وقت قریب آنے پر لیا گیا کوئی بھی غیر ذمہ دارانہ فیصلہ ملک میں ابہام، عدم اعتماد اور افراتفری کو بڑھا سکتا ہے، جس کا براہِ راست اثر پہلے ہی متاثرہ عوام پر پڑے گا۔
ہیتی میں یہ بحران کوئی نیا نہیں ہے۔
جولائی 2021 میں صدر جووینل موئیس کے قتل کے بعد سے ملک مسلسل سیاسی اور سماجی غیر استحکام سے دوچار ہے۔ اپریل 2024 میں کیریبین ممالک کی ثالثی سے عبوری صداراتی کونسل کا قیام عمل میں آیا تھا، جب گینگزکے تشدد کے دوران سابق وزیر اعظم ایریل ہینری کو استعفیٰ دینا پڑا تھا۔ اس وقت گینگزنے ہوائی اڈے بند کر دیے تھے اور اہم بنیادی ڈھانچوں پر قبضہ کر لیا تھا۔
اس کونسل کا بنیادی مقصد ایک نئے وزیر اعظم کا انتخاب کر کے ملک میں استحکام قائم کرنا تھا۔ فلز-ایمی نومبر 2025 میں تیسرے وزیر اعظم کے طور پر مقرر کیے گئے تھے، اس سے پہلے گیری کونیلے کو ہٹا دیا گیا تھا۔
کونسل کا دورِ کار 7 فروری 2026 کو ختم ہونا ہے، لیکن اس کے حوالے سے غیر یقینی صورتحال برقرار ہے۔ ناقدین کا الزام ہے کہ بعض ارکان اقتدار میں رہنے کی کوشش کر رہے ہیں، جس سے پرتشدد احتجاج پھٹنے کا خطرہ ہے۔ ابتدا میں امید تھی کہ 2024 میں انتخابات ہوں گے، لیکن گینگوں کی تشدد کے سبب اب پہلا مرحلہ اگست 2026 اور دوسرا مرحلہ دسمبر 2026 میں مقرر کیا گیا ہے۔صورتحال کتنی سنگین ہے، اس کا اندازہ اقوام متحدہ کی رپورٹ سے لگایا جا سکتا ہے۔ رپورٹ کے مطابق گزشتہ سال جنوری سے نومبر کے درمیان 8,100 سے زائد ہلاکتیں درج کی گئیں، جبکہ گینگوں کے زیرِ کنٹرول علاقوں تک محدود رسائی کے سبب اصل اعداد و شمار اس سے کہیں زیادہ ہو سکتے ہیں۔امریکہ اور اقوام متحدہ دونوں نے ہیتی کے رہنماوں سے اختلافات بھلا کر ادارہ جاتی تسلسل قائم رکھنے اور انتخابی عمل پر توجہ مرکوز کرنے کی اپیل کی ہے۔ لیکن موجودہ حالات میں سوال یہ ہے—کیا ہیتی سیاسی کشمکش سے باہر نکل پائے گا یا یہ غیر استحکام کا دور مزید گہرا ہوگا؟