کھٹمنڈو: نیپال میں ہفتے کی دوپہر 2.9 شدت کا زلزلہ ریکارڈ کیا گیا۔نیشنل سینٹر فار سیسمولوجی (این سی ایس) کے مطابق یہ زلزلہ 20 دسمبر 2025 کو دوپہر 2 بج کر 10 منٹ پر آیا اور اس کی گہرائی 5 کلومیٹر تھی۔ این سی ایس نے سوشل میڈیا پلیٹ فارم ایکس پر معلومات شیئر کرتے ہوئے بتایا کہ زلزلے کا مرکز 27.79 ڈگری شمالی عرضِ بلد اور 87.33 ڈگری مشرقی طولِ بلد پر واقع تھا۔
زلزلے کے جھٹکے ہلکے تھے اور جان و مال کے کسی نقصان کی فوری اطلاع موصول نہیں ہوئی۔ قابلِ ذکر ہے کہ اس سے قبل 7 دسمبر کو نیپال میں 4.1 شدت اور 30 نومبر کو 4.2 شدت کا زلزلہ ریکارڈ کیا گیا تھا۔ مسلسل آنے والے ان جھٹکوں سے سائنس دانوں اور مقامی انتظامیہ کی تشویش میں اضافہ ہو گیا ہے۔
زلزلوں کے لیے حساس کیوں ہے نیپال ؟
نیپال ہمالیائی خطے میں واقع ہے جہاں ہندوستانی اور یوریشیائی ٹیکٹونک پلیٹوں کی مسلسل ٹکراہوتی رہتی ہے۔ اسی ٹکراؤ کے باعث زمین کے اندر شدید دباؤ اور تناؤ پیدا ہوتا ہے جو وقتاً فوقتاً زلزلے کی صورت میں باہر نکلتا ہے۔ ماہرین کے مطابق نیپال ایک سبڈکشن زون میں بھی واقع ہے جہاں ہندوستانی پلیٹ یوریشیائی پلیٹ کے نیچے سرک رہی ہے۔ یہی وجہ ہے کہ یہ علاقہ دنیا کے سب سے زیادہ زلزلہ خیز علاقوں میں شمار کیا جاتا ہے۔
سائنس دان بتاتے ہیں کہ کم گہرائی میں آنے والے زلزلے زیادہ خطرناک ہوتے ہیں کیونکہ ان کی توانائی براہِ راست زمین کی سطح تک پہنچتی ہے۔ تاہم اس بار شدت کم ہونے کی وجہ سے کسی بڑے نقصان سے بچا رہا۔ نیپال اس سے قبل 2015 کے تباہ کن زلزلے جیسی آفت کا سامنا کر چکا ہے جس میں ہزاروں افراد جان سے گئے تھے۔ ایسے میں بار بار آنے والے جھٹکے مستقبل کے حوالے سے تشویش میں اضافہ کر رہے ہیں۔