انٹرنیشنل ڈیسک: مشرق وسطیٰ میں جاری کشیدگی کے درمیان اسرائیل اور ایران کے درمیان میزائل حملوں کا سلسلہ مسلسل چھٹے روز بھی جاری رہا۔ اس جنگ میں اب تک 585 افراد ہلاک اور 1326 زخمی ہو چکے ہیں۔ یہ اطلاع انسانی حقوق کے ایک گروپ نے اے پی نیوز ایجنسی کو دی۔
اسرائیلی وزیر دفاع کا بڑا دعویٰ
اسرائیلی وزیر دفاع اسرائیل کاٹز نے بدھ کے روز دعویٰ کیا ہے کہ اسرائیلی فضائیہ نے ایران کی داخلی سلامتی ایجنسی کے ہیڈ کوارٹر کو مکمل طور پر تباہ کر دیا ہے۔ تاہم ایرانی جانب سے فوری طور پر اس دعوے کی تصدیق نہیں کی گئی۔ ایران کی خبر رساں ایجنسی فارس نے اطلاع دی ہے کہ تہران کے مغرب میں واقع شہر کرج میں دھماکوں کی آوازیں سنی گئیں۔ یہ دھماکے پیام ہوائی اڈے کے قریب ہوئے۔ ان دھماکوں کی وجوہات کی تاحال سرکاری طور پر تصدیق نہیں ہو سکی ہے۔
ایران کی امریکہ کو وارننگ
ایران کے سپریم لیڈر آیت اللہ علی خامنہ ای نے امریکی صدر ڈونالڈ ٹرمپ کو براہ راست پیغام میں خبردار کیا ہے کہ ایران کبھی ہتھیار نہیں ڈالے گا، اگر امریکہ نے فوجی مداخلت کی تو اسے وہ نقصان اٹھانا پڑے گا جو کبھی پورا نہیں ہو سکے گا۔
جی 7 ممالک نے کی امن کی اپیل 
ادھر کینیڈا میں جی 7 سربراہی اجلاس میں شریک رہنماو¿ں نے ایران اور اسرائیل سے جنگ بند کرنے کی اپیل کی ہے۔ فرانسیسی صدر ایمانوئل میکرون نے کہا کہ ڈونالڈ ٹرمپ نے پہلے ہی دونوں ممالک کے درمیان ممکنہ جنگ بندی معاہدے کی شروعات کر دی ہے۔