نئی دہلی: شمال مشرقی دہلی میں فساد اورتشدد معاملے میں ہلاک ہونے والوں کی تعداد بڑھ کر 24 تک پہنچ گئی ہے۔ بدھ کو7 دیگرلوگوں کی موت ہوگئی ہے۔ تشدد میں 56 پولیس اہلکاروں سمیت تقریبا 200  لوگ زخمی بتائے جارہے ہیں۔ گوروو تیغ بہادر ہسپتال(جی ٹی بی ہسپتال) کے مطابق ہلاک شدگان کی تعداد 24 ہوگئی ہے جبکہ 200 لوگ زخمی حالت میں لائے گئے ہیں۔

وہیں دہلی پولیس کے پی آر او ایم ایس رندھاوا نے کہا ہے کہ دہلی تشدد معاملے میں اب تک 106 لوگوں کو گرفتار کیا گیا ہے۔ 18 لوگوں کے خلاف ایف آئی آر درج کی گئی ہے۔ انہوں نے کہا کہ ہم شمال مشرقی اضلاع کیلئے دو نمبر 22829334 اور 22829335 دستیاب کرا رہے ہیں۔ اس سے ہم لوگوں کو اپیل کرنا چاہیں  گے کہ اگر آپ کو کسی مدد کی ضرورت ہے، آپ کے پاس کوئی اطلاع ہے، تو آپ بتا سکتے ہیں۔

امت شاہ نے 24 گھنٹے میں بلائی چوتھی میٹنگ

مرکزی وزیر داخلہ امت شاہ نے دہلی کے تشدد کو لے کر پھر سے میٹنگ بلائی تھی۔ اس میٹنگ میں قومی سلامتی کے مشیر اجیت ڈوبھال بھی موجود تھے۔ یہ منگل سے وزیر داخلہ امت شاہ کی اس موضوع پر چوتھی میٹنگ ہے۔ دہلی تشدد کو کنٹرول کرنے کی ذمہ داری اجیت ڈوبھال کو سونپ دی گئی ہے۔ انہوں نے فساد متاثرہ علاقہ موجپور اور بابر پور کا دورہ کیا۔