بیجنگ:چین میں جان لیوا کورونا وائرس سے مرنے والوں کی تعد اد مسلسل بڑھ رہی ہے ۔ چینی حکومت کی جانب سے جاری تازہ اعداد وشمار کے مطابق ابھی تک کورونا وائرس کے چلتے 563 لوگوں کی موت ہو گئی ہے جبکہ28,018 لوگوں میں اس کے اثرات پائے جانے کی تصدیق ہوئی ہے۔
چین کی سرکاری صحت کمیٹی کے مطابق پانچ فروری کی آدھی رات تک 31 صوبوں سے اطلاع ملی، جس کے مطابق کورونا وائرس کے 28,018 کیسز کی تصدیق کی جا چکی ہے جس میں 3,859 لوگوں کی حالت نازک بتائی جارہی ہے،563 لوگوں کی موت ہو چکی ہے اور 1153 افراد کو ہسپتال سے چھٹی دے دی گئی ہے۔
اس سے پہلے بدھ کو جاری رپورٹ کے مطابق کورونا وائرس سے 490 افراد ہلاک ہو گئے تھے اور 24,324 معاملات کی تصدیق ہوئی تھی ۔
چین میں کورونا وائرس کو لیکر چینی صدر شی جن پنگ نے بدھ کو کہا کہ حالات بہت سنگین ہیں۔ انہوں نے کہا کہ وائرس کو روکنے لئے اور اس پر قابو پانے کے لئے قانون پر مبنی ، سائنسی اور اجتماعی کوششوں کی ضرورت ہے ۔انہوں نے یہ بات کمیونسٹ پارٹی کی سنٹرل کمیٹی کی میٹنگ کے دوران کہی ۔