نئی دہلی : کانگرس نے الزام لگایاہے کہ مودی حکومت لوک سبھا انتخابات میں ملی عوام کی زبردست حمایت کا ناجائز استعمال کررہی ہے اور اس نے جمہوریت کو انتہائی سنگین بحران کے دور میں لاکھڑاکیاہے ۔

کانگرس نے جمعہ کو ٹویٹر پر پارٹی صدر سونیا گاندھی کے حوالہ سے ٹویٹ کیا کہ ہماری جمہوریت کبھی اتنے سنگین بحران سے نہیں گزری ہے ۔لوک سبھا کے 2019کے انتخابات میں ملی واضح اکثریت کا ناجائز استعمال ہورہا ہے اور خطرناک طریقہ سے جمہوریت سے کھلواڑ کیاجارہاہے ۔

اس کے ساتھ ہی پارٹی نے محترمہ گاندھی کی تقریر کے دوران تصویر کیساتھ ایک پوسٹر بھی پوسٹ کیاہے جس میں لکھاہے  ملک ان طاقتوں کو روکنے کے لئے  ہماری طرف امیدکی نگاہوں سے دیکھ رہاہے ۔یہ طاقتیں گاندھی جی ،سردار پٹیل اور ڈاکڑ بی آر امبیڈکر کو اپنے نظریہ سے جوڑ نے کی کوشش کرکے اپنے مفادمیں ان کے پیغامات کو غلط طریقہ سے پیش کررہی ہیں ۔