کانگرس کے سینئر رہنما اور سابق وزیر خزانہ پی چدمبرم مودی حکومت کو گھیرنے کا موقع نہیں گنوا رہے ہیں۔ وہ آئےدن کسی نہ کسی مسئلے پر حکومت پر حملہ کرتے ہیں۔ اب انہوں نے اس معاشی پیکیج کے بارے میں کہا کہ وزیر اعظم نریندر مودی نے 20 لاکھ کروڑ روپے کا اعلان کیا اور صرف ہیڈ لائن (سرخی) دی اور کوئی تفصیلات نہیں بتائیں۔
چدمبرم نے ٹویٹ کیا کہ منگل کو وزیر اعظم نے ہمیں ایک سرخی دی اور ایک خالی صفحہ چھوڑ دیا۔ فطری طور پر ، میرا ردِّ عمل بھی اس خالی صفحے کی طرح ہوگا۔ انہوں نے کہا کہ آج ہم اس خالی صفحے کو بھرنے کے لئے وزیر خزانہ کی طرف دیکھ رہے ہیں۔ ہم ہر اضافی روپیہ احتیاط سے گنیں گے جسے حکومت واقعی معیشت میں ڈالے گی۔ ہم یہ بھی چھان بین کریں گے کہ کس کو کیا ملتا ہے؟
سابق وزیر خزانہ نے کہا کہ پہلی بات یہ ہے کہ سیکڑوں کلومیٹر پیدل چلنے کے بعد غریب ، بھوک اور تباہ حال مہاجر مزدور کیا امید کرسکتے ہیں؟ ہم دیکھیں گے کہ حقیقی رقم کے معاملے میں نچلے حصے  کی آبادی(13 کروڑ کنبے) کو کیا ملے گا؟