نیشنل ڈیسک: ایئر  انڈیا کی حصہ داری کو فروخت کرنے کی تیاری شروع ہو گئی ہے۔مودی حکومت نے پیر کو ابتدائی معلومات والا میمورنڈم جاری کر دیا۔حکومت کی اس تجویز کے خلاف بی جے پی رہنما سبرامنیم سوامی کھڑے ہوگئے ہیں۔ بی جے پی کے رہنما سبرامنیم سوامی نے ٹویٹ کے ذریعے فیصلے کی مخالفت کرتے ہوئے کہا کہ یہ سودا مکمل طور پر ملک مخالف ہے اور مجھے کورٹ جانے کے لئے مجبور ہونا پڑے گا۔ ہم خاندان کی قیمتی چیز کو فروخت نہیں کر سکتے  ہیں۔

بھارتیہ جنتا پارٹی (بی جے پی) کے سینئر لیڈر اور راجیہ سبھا ممبر پارلیمنٹ سبرامنیم سوامی پہلے بھی  ایئر  انڈیا کو فروخت کرنے کی حکومت کی منصوبہ بندی سے ناراضگی جتا چکے ہیں۔مانا جا رہا ہے کہ مرکز کے اس فیصلے کو لے کر سیاسی اور قانونی رکاوٹ پیدا ہو سکتی ہے۔

سبرامنیم سوامی  ایئر انڈیا کو لے کر بولی کے عمل کے لئے اٹھائے گئے اقدامات کے خلاف پہلے بھی وارننگ دے چکے ہیں۔انہوں نے یہ کہتے ہوئے بھی اس کی تنقید کی کہ اس معاملے پر فی الحال پارلیمانی پینل کی طرف بحث کی جا رہی ہے۔انہوں نے گزشتہ دنوں کہا تھا کہ ابھی یہ  (ایئر انڈیا ڈس انوسٹمنٹ) مشاورتی کمیٹی کے سامنے ہے اور میں اس کا ایک رکن ہوں۔مجھے ایک نوٹ دینے کے لئے کہا گیا ہے، جس پر اگلے اجلاس میں بحث کی جائے گی۔وہ اس کے بغیر آگے نہیں بڑھ سکتے۔انہوں نے خبردار کرتے ہوئے کہا تھا اگر وہ ایسا کرتے ہیں تو میں عدالت جاؤں گا، وہ یہ بھی جانتے ہیں۔