انٹرنیشنل ڈیسک: دنیا میں بہت سے شہر اپنی خوبصورتی یا تاریخ کے لیے مشہور ہیں لیکن چین کا چونگ کنگ (Chongqing) شہر اپنی منفرد طرز تعمیر اور پیچیدہ جغرافیائی ساخت کی وجہ سے دنیا بھر میں موضوعِ بحث بن گیا ہے۔ اسے پیار سے '8D سٹی 'کہا جاتا ہے یعنی ایسا شہر جہاں اوپر، نیچے، دائیں، بائیں، آگے، پیچھے ہر سمت میں کچھ نہ کچھ چل رہا ہوتا ہے۔ یہ شہر کسی سائنس فکشن فلم کے سیٹ سے کم نہیں لگتا۔

کیوں کہلاتا ہے یہ '8D سٹی'؟
چونگ کنگ کا یہ انوکھا نام اس کی کثیر الجہتی (Multi-dimensional) تعمیر کی وجہ سے پڑا ہے۔ یہ شہر مکمل طور پر بلندی، گہرائی اور ڈھلانوں پر آباد ہے۔ یہاں سڑکیں اوپر نیچے جاتی ہیں اور عمارتیں کئی منزلیں نیچے یا اوپر سے جڑتی ہیں۔ یہ شہر چین کے جنوب مغرب میں یانگتزی (Yangtze) اور جیالِنگ (Jialing) دریاؤں کے سنگم پر واقع ہے جو اس کی پیچیدگی کو اور بڑھا دیتا ہے۔

نمایاں کشش: لِزِیبا اسٹیشن
چونگ کنگ کی سب سے بڑی اور حیران کن خصوصیت اس کا مونو ریل ٹرین سسٹم ہے۔ لِزِیبا اسٹیشن نامی جگہ پر ٹرین سیدھی ایک رہائشی عمارت کے درمیان سے گزرتی ہے۔ حیرت کی بات یہ ہے کہ وہاں کے لوگ نہ تو شکایت کرتے ہیں اور نہ ہی پریشان ہوتے ہیں بلکہ یہ انوکھی طرز تعمیر اب چونگ کنگ کی پہچان بن چکی ہے۔

ٹرانسپورٹ اور ٹیکنالوجی کا حیرت انگیز امتزاج
80 لاکھ سے زائد آبادی والا یہ شہر پہاڑی علاقوں میں آباد ہونے کے باوجود نقل و حمل (Transport) کے نظام کے لحاظ سے لاجواب ہے۔
ملٹی لیول روڈ سسٹم: یہاں کا ملٹی لیول روڈ سسٹم اتنا جدید ہے کہ کبھی کبھی ایک ہی جگہ پر 5 سے 6 منزلوں والی سڑکیں ہوتی ہیں جو مختلف سمتوں میں جاتی ہیں۔ یہی وجہ ہے کہ نقشہ (GPS) بھی یہاں کئی بار الجھ جاتا ہے۔
سائبرپنک سٹی: رات کے وقت جب یہ شہر روشنی میں نہاتا ہے تو اس کی گلیاں، پل اور عمارتیں مستقبل کے کسی سائبرپنک شہر کی جھلک پیش کرتی ہیں۔

سمارٹ ٹیکنالوجی: چونگ کنگ چین کے سب سے اسمارٹ شہروں میں سے ایک ہے۔ یہاں کا اسمارٹ ٹریفک سسٹم، چہرہ شناخت کرنے والے کیمرے، اے آئی (AI) پر مبنی ٹریفک کنٹرول اور تیز رفتار 5G نیٹ ورک اسے دنیا سے کئی سال آگے کھڑا کرتے ہیں۔ یہاں ہر ٹریفک لائٹ اور کیمرہ آپس میں جڑا ہوا ہے جو ٹریفک کو بغیر پولیس کی موجودگی کے بھی قابو میں رکھ لیتا ہے۔ یہ شہر طرز تعمیر کے لحاظ سے بھی دنیا کے سب سے پیچیدہ شہروں میں شمار ہوتا ہے جہاں بسیں، ٹرینیں اور کیبل کاریں (Cable Cars) سب مل کر اسے ایک 8  ڈائمیشنل  (8  جہتی / 8D )شہر بناتے ہیں۔