انٹرنیشنل ڈیسک: سنگاپور کے چانگی ایئرپورٹ پر مختلف دکانوں میں چوری کرنے کے الزام میں دو بھارتی خواتین کو حراست میں لے لیا گیا۔ پولیس نے پیر کو یہ جانکاری دی۔ 'اسٹریٹس ٹائمز' اخبار نے پولیس کے ایک بیان کا حوالہ دیتے ہوئے کہا کہ 29 اور 30 سال کی ان خواتین نے 2 جون کو چوری کی واردات کو انجام دیا تھا۔ دونوں خواتین کو ملک چھوڑنے سے قبل حراست میں لیا گیا ۔ پولیس کو ٹرمینل تھری کے ڈیپارچر ٹرانزٹ ایریا میں ایک مشتبہ چوری کے معاملے میں پولیس کو اس کی اطلاع دی گئی تھی۔

سی سی ٹی وی کیمرے کی فوٹیج کا استعمال کرتے ہوئے، ہوائی اڈے کے اہلکاروں نے ایک گھنٹے کے اندر دونوں خواتین کی شناخت کی اور ان کو ڈھونڈ لیا۔ خواتین سے چوری شدہ پرس، بیگ اور پرفیوم کی بوتل برآمد ہوئی، جو مبینہ طور پر چوری کی گئی تھیں۔ خبر کے مطابق تینوں اشیاء کی مجموعی مالیت 635 سنگاپوری ڈالر تھی۔ توقع ہے کہ ان خواتین پر 10 جون کو عدالت میں فرد جرم عائد کی جائے گی اور اگر جرم ثابت ہوا تو سات سال قید، جرمانہ یا دونوں سزائیں ہو سکتی ہیں۔ بیان میں کہا گیا ہے کہ، پولیس اسٹیک ہولڈرز اور کمیونٹی کے ساتھ مل کر کام کرتی رہے گی تاکہ دکان سے چوری کے واقعات کو روکا جا سکے۔