واشنگٹن: امریکہ میں پہلی بار کسی شخص کی ایچ5 این5 برڈ فلو سے موت کا شبہ ظاہر کیا گیا ہے۔ یہ معاملہ نہ صرف نایاب ہے بلکہ سائنس دانوں کے لیے تشویش کا باعث بھی بنا ہے۔ اگرچہ صحت کے حکام فی الحال اسے کم خطرے والا معاملہ بتا رہے ہیں اور برادری میں انفیکشن پھیلنے کے کوئی اشارے نہیں ملے ہیں۔ امریکہ کی واشنگٹن ریاست میں ایک شخص کے پہلی بار برڈ فلو کی ایک نایاب قسم سے مرنے کا شبہ ظاہر کیا جا رہا ہے۔ ریاست کے صحت حکام نے تاہم کہا ہے کہ اس سے لوگوں کو زیادہ خطرہ نہیں ہے۔ واشنگٹن کے محکم صحت نے جمعہ کو ایک بیان میں کہا کہ مرنے والا شخص ایک معمر فرد تھا جسے پہلے سے کئی صحت مسائل تھے اور ایچ5 این5 (برڈ فلو) وائرس سے متاثر ہونے کے باعث اس کا علاج جاری تھا۔
بیان میں کہا گیا ہے کہ ایسا لگتا ہے کہ وہ اس قسم کے وائرس سے متاثر ہونے والا پہلا انسان تھا۔ صحت حکام نے بتایا کہ سیئٹل سے تقریبا 125 کلومیٹر جنوب مغرب میں گریژ ہاربر کاؤنٹی میں رہنے والے اس شخص کے گھر کے پیچھے پالتو مرغیوں کا ایک جھنڈ رہتا تھا جو جنگلی پرندوں کے رابطے میں آ گیا تھا۔ صحت حکام کے بیان میں کہا گیا ہے، لوگوں کے لیے خطرہ کم ہے۔ جانچ میں کسی اور شخص کو ' ایویئن انفلوئنزا' سے متاثر نہیں پایا گیا ہے۔
حکام نے کہا کہ وہ متاثرہ شخص کے قریبی رابطے میں آنے والے ہر فرد پر نظر رکھیں گے، لیکن دیگر لوگوں کے اس وائرس سے متاثر ہونے کا کوئی ثبوت نہیں ہے۔ اس ماہ کے اوائل میں روگ کنٹرول و روک تھام مرکز نے انفیکشن کے بارے میں ایک بیان جاری کرکے کہا تھا کہ ایسی کوئی معلومات نہیں ہے جس سے پتہ چلے کہ اس معاملے کی وجہ سے عوامی صحت کے لیے خطرہ بڑھ گیا ہے۔ ایچ5 این5 کو انسانوں کے لیے ایچ5 این1 سے زیادہ بڑا خطرہ نہیں مانا جا رہا ہے۔