انٹرنیشنل ڈیسک: مصر کے بحیرہ احمر میں واقع شرم الشیخ میں ریزورٹ جاتے وقت ہفتہ کے روز ایک کار حادثے میں قطر کے تین سفارتکار جاں بحق ہو گئے۔ صحت کے حکام نے یہ جانکاری فراہم  کی ۔ حکام نے بتایا کہ شرم الشیخ سے تقریبا 50 کلومیٹر (31 میل)دور ایک گاڑی کے الٹ جانے سے دو دیگر سفارتکار زخمی ہو گئے۔ حکام نے نام ظاہر نہ کرنے کی شرط پر بتایا کہ قطر کی پروٹوکول ٹیم کے یہ سفارتکار حماس اور اسرائیل کے درمیان جنگ بندی معاہدہ ہونے کی خوشی میں منعقد ایک اعلی سطحی سربراہی اجلاس سے پہلے شہر جا رہے تھے۔
قطر نے مصر اور امریکہ کے ساتھ مل کر جنگ بندی معاہدے کی ثالثی کی تھی۔ ترکی بھی اس ماہ کے آغاز میں شرم الشیخ میں ہونے والی بات چیت میں شامل ہوا۔ اسرائیل اور حماس کے درمیان جنگ بندی معاہدہ نافذ ہونے کے بعد یرغمالیوں اور سینکڑوں فلسطینی قیدیوں کو رہا کیا گیا۔ مصر کے صدارتی دفتر کی جانب سے جاری ایک بیان کے مطابق، شرم الشیخ سربراہی اجلاس کی میزبانی کرے گا اور اس کی شریک صدارت مصر کے صدر عبد الفتاح السیسی اور امریکہ کے صدر ڈونالڈ ٹرمپ کریں گے۔ بیان میں بتایا گیا ہے کہ اس سربراہی اجلاس میں فرانس کے صدر ایمانویل میکرون، اسپین کے وزیر اعظم پیدرو سانچیز اور اقوام متحدہ کے سیکریٹری جنرل انتونیو گوتریس سمیت دنیا کے دو درجن سے زائد رہنما شریک ہوں گے۔