سیئول: جنوبی کوریا کی 81 سالہ فیشن ماڈل چوئی سون ہوا نے ملک کے قومی مقابلہ حسن میں  اپنے پوتے پوتیوں کی عمر کے مقابلے بازوں کے ساتھ 'بہترین ڈریسر' کا ٹائٹل اپنے نام کر لیا،  لیکن وہ سب سے عمر دراز  'مس یونیورس' کی مدمقابل بننے سے  چوک گئیں ۔  موتیوں سے مزین سفید گاؤن پہنے سفید بالوں والی چوئی سون ہوا نے پیر کو جنوبی کوریا کے دارالحکومت سیول کے ایک ہوٹل میں منعقدہ مس یونیورس کوریا مقابلے کے اسٹیج پر آئیں اور انہوں نے گانے کے مقابلے میں پرفارم کیا۔ وہ تاج حاصل کرنے سے چوک گئی ، لیکن 'بہترین ملبوس' کا خطاب اپنے نام کیا۔

22 سالہ فیشن اسکول کی طالبہ ہان ایریل نے یہ مقابلہ جیت لیا اور وہ نومبر میں ہونے والے 73ویں مس یونیورس مقابلے میں حصہ لینے کے لیے میکسیکو سٹی جائیں گی۔ چوئی، جو ایک سابقہ ہسپتال کارکن ہیں، نے اپنے ماڈلنگ کیریئر کا آغاز 70 کی دہائی میں کیا۔ وہ اس ماہ کے شروع میں 31 دیگر مدمقابلوں کے ساتھ 'مس یونیورس کوریا' کی فائنل لسٹ میں شامل تھیں۔ چوئی نے پیر کے مقابلے سے چند گھنٹے قبل دی ایسوسی ایٹڈ پریس کو بتایا کہ اس عمر میں بھی، مجھ میں موقع لینے اور چیلنج کا مقابلہ کرنے کی ہمت ہے۔

انہوں نے کہا، 'میں چاہتی ہوں کہ لوگ مجھے دیکھیں اور یہ سمجھیں کہ جب آپ کو وہ چیز مل جاتی ہے جو آپ چاہتے ہیں اور اس خواب کو حاصل کرنے کے لیے خود کو چیلنج کرتے ہیں، تو آپ صحت مند  رہ سکتے ہیں اور زندگی میں خوشیاں حاصل کر سکتے ہیں۔' ایک سال پہلے، چوئی کے لیے یہ ناممکن تھا۔  کیونکہ مس یونیورس کا مقابلے میں صرف 18 سے 28 سال کی عمر کی خواتین حصہ لے سکتی تھیں۔ 

اس عمر کی حد کو کافی عرصے سے تنقید کا نشانہ بنایا جا رہا تھا اور اس سال مقابلے کو مزید جدید اور متنوع بنانے کی کوشش میں ہٹا دیا گیا تھا۔ کورین بیوٹی مقابلہ کے منتظمین نے مقابلے میں مزید خواتین کو شامل کرنے کے لیے 'سوئم سوٹ' مقابلے اور تعلیمی سطح، قد اور غیر ملکی زبان کی مہارت سے متعلق اہلیت کے تقاضوں کو بھی ہٹا دیا۔