نئی دہلی : مہاتما گاندھی کے قاتل ناتھو رام گوڈسے کو محب وطن بتانا بھاجپا ایم پی سادھوی پرگیا ٹھاکر کو مہنگا پڑ گیا ہے ۔ بھاجپا کے ایگزیکٹو صدر جے پی نڈا کی سفارش کے بعد پارلیمانی امور وزیر پرہلاد جوشی نے پرگیا ٹھاکو دفاعی معاملوں کی مشاورتی کمیٹی سے ہٹا دیا ہے ۔ ساتھ ہی بھاجپا نے پرگیا ٹھاکر کو بھاجپا پارلیمانی جماعت کی میٹنگوں میں بھی نہیں آنے کا فرمان سنایا ہے ۔ ذرائع کے مطابق بھاجپا پرگیا ٹھاکر پر سخت کارروائی کر سکتی ہے ۔ بتایا جارہا ہے کہ ان کو پارٹی سے باہر بھی نکالا جا سکتا ہے ۔
بھاجپا ایگزیکٹو صدر جے پی نڈا نے کہا کہ پارلیمنٹ میں پرگیا ٹھاکر کا بیان قابل مذمت ہے اور بھاجپا کبھی اس طرح کے بیان یر نظریے کی حمایت نہیں کرتی ۔ بتا دیں کہ پرگیا سنگھ ٹھاکر نے بدھ کے روز لوک سبھا میں ایس پی جی ترمیمی بل پر چرچہ کے دوران بابائے قوم (راشٹر پتا) مہاتما گاندھی کے قاتل ناتھو رام گوڈسے کا حوالہ 'محب وطن' کے طور پر دیا ۔ جس کو لے کر کانگرس ممبران نے سخت مخالفت کی تھی ۔