ماسکو: مغربی ممالک کے تبصروں کے بعدبھڑکے روس نے ایٹمی ہتھیاروں سے لیس فوجی مشقوں کا منصوبہ بنایا ہے۔ وزارت دفاع نے پیر کو یہ اعلان کیا۔ روس کا یہ قدم ایک ایسے وقت میں سامنے آیا ہے جب ابھی چند روز قبل ہی مغربی ممالک نے یوکرین کے ساتھ جنگ کے حوالے سے ماسکو کے خلاف تبصرے کیے تھے۔ وزارت دفاع نے ایک بیان میں کہا کہ یہ مشق روس کے حوالے سے بعض مغربی ممالک کے حکام کے اشتعال انگیز بیانات اور دھمکیوں کے جواب میں ہے۔

یہ پہلا موقع ہے کہ روس نے عوامی سطح پر جوہری ہتھیاروں پر مشتمل مشقوں کا اعلان کیا ہے۔ تاہم اس کی اسٹریٹجک نیوکلیئر فورس باقاعدگی سے مشق کرتی رہتی ہے۔ یہ اعلان یوکرین کے مغربی اتحادیوں کے لیے ایک انتباہ معلوم ہوتا ہے، جو دو سال سے زائد عرصے سے جاری روس-یوکرین جنگ پر شدید تحفظات کا اظہار کر رہے ہیں۔

فرانسیسی صدر ایمانوئل میکرون نے گزشتہ ہفتے اس بات کا اعادہ کیا کہ وہ یوکرین میں فوج بھیجنے سے انکار نہیں کر رہے ہیں۔ اسی دوران برطانوی وزیر خارجہ ڈیوڈ کیمرون نے کہا کہ کیف کی افواج روس کے اندر اہداف پر حملہ کرنے کے لیے برطانیہ کے طویل فاصلے تک مار کرنے والے ہتھیار استعمال کر سکیں گی۔