نیشنل ڈیسک: پاکستان کے فوجی سربراہ فیلڈ مارشل عاصم منیر ایک بار پھر بڑھ چڑھ کر بیان دیتے نظر آئے، جہاں انہوں نے نہ صرف پاکستانی فوج کی خوب تعریف کی بلکہ  ہندوستان کو بھی بالواسطہ دھمکی دینا نہیں بھولے۔ اردن کے بادشاہ عبداللہ دوم کے اعزاز میں منعقدہ لنچ کے دوران منیر نے دعوی کیا کہ پاکستانی فوج  'اللہ کی فوج 'ہے اور مسلمانوں کا بھروسہ دشمن پر پھینکی ہوئی مٹی کو بھی میزائل بنا دیتا ہے۔
 روزنامہ جنگ کی رپورٹ کے مطابق، اس ملاقات میں منیر نے مئی میں  ہندوستان  کے ساتھ مبینہ چار روزہ ٹکراؤ  کا ذکر کرتے ہوئے پھر وہی پرانا دعوی دوہرایا کہ پاکستان نے  ہندوستان  کے حملوں کا مضبوطی سے جواب دے کر فتح حاصل کی تھی۔ انہوں نے کہا کہ 7 سے 10 مئی تک جاری رہنے والی جنگ میں اللہ نے پاکستان کی عزت بچائی اور پاکستانی فوج نے ہر محاذ پر  ہندوستانی حملوں کو ناکام کیا۔
 منیر نے اپنے بیان میں کہا کہ ہندوستان  کے ساتھ جنگ میں اللہ نے ہمیں سر اونچا رکھنے میں مدد کی۔ جب مسلمان اللہ پر بھروسہ کرتا ہے تو دشمن پر پھینکی گئی مٹی بھی میزائل بن جاتی ہے۔ انہوں نے یہ بھی دوہرایا کہ پاکستانی فوج اللہ کے حکم پر چلتی ہے اور اس کے سپاہی اللہ کے نام پر لڑتے ہیں۔
 اس کے ساتھ ہی، انہوں نے اردن کے ساتھ دفاعی تعلقات کو مزید مضبوط کرنے کے عزم کا اظہار کیا۔ منیر نے کہا کہ پاکستان، عسکری تعاون بڑھانے اور خطے میں امن کے مشترکہ تصور کو حقیقت بنانے کے لئے ہر ممکن قدم اٹھائے گا۔ اردن کے بادشاہ عبداللہ دوم ان دنوں اپنے وفد کے ساتھ دو روزہ پاکستان کے دورے پر ہیں، جس کا بنیادی مقصد دونوں ممالک کے درمیان دفاعی تعاون کو بڑھانا ہے۔