تین طلاق سے متعلق بل پیش ہونے سے پہلے ہی راجیہ سبھا میں بجٹ سیشن کے اختتام کا اعلان کردیا گیا ۔ ایوان میں رافیل معاملہ پر کیگ رپورٹ پیش کی گئی ، جس کے مطابق مودی حکومت کی رافیل ڈیل یوپی اے حکومت میں مجوزہ ڈیل سے سستی ہے۔ کیگ رپورٹ پیش ہونے کے بعد سے ہی اپوزیشن نے ہنگامہ آرائی شروع کردی جس وجہ سے تین طلاق بل پاس نہیں ہو سکا۔
خیال رہے کہ اپوزیشن کا مطالبہ ہے' مسلم خواتین (شادی کے حقوق کا تحفظ ) بل 2018 'کو سلیکٹ کمیٹی میں بھیجا جائے ۔ آل انڈیا مسلم پرسنل لا ء بورڈ نے بھی تین طلاق سے متعلق بل کو خواتین مخالف قرار دیا ہے ۔مجوزہ قانون کے تحت ایک مرتبہ میں تین طلاق دینا غیر قانونی اور کالعدم ہوگا اور ایسا کرنے والے کو تین سال تک کی سزا ہوسکتی ہے ۔ گزشتہ سال دسمبر میں اس بل کو لوک سبھا میں پاس کردیا گیا تھا ۔جبکہ راجیہ سبھا میں پاس ہونا باقی ہے۔