کٹھمنڈو: نیپال میں برفانی تودے گرنے (ہمسکھیلن) کے دو الگ الگ واقعات میں دو نیپالی گائیڈز سمیت کم از کم نو کوہ پیماوں کی موت ہو گئی۔ حکام نے منگل کو یہ اطلاع دی۔ پولیس کے ڈپٹی سپرنٹنڈنٹ گین کمار مہتو نے بتایا کہ پیر کی صبح تقریباً دس بجے گوریشنکر گرام پالیسا کے تحت ماونٹ یالنگ ری (6,920 میٹر) کے قریب چوٹی پر چڑھنے کی کوشش کے دوران برفانی تودے میں سات کوہ پیما دفن ہو گئے۔ انہوں نے بتایا کہ سات پہاڑ چڑھنے والوں کی لاشیں نکالنے کے لیے مشترکہ ریسکیو مہم چلائی گئی ہے۔

متوفی پہاڑ چڑھنے والوں میں دو نیپالی، دو اطالوی—پاولو کوکو اور مارکو دی مارسیلو، ایک کینیڈین، ایک فرانسیسی اور ایک جرمن شامل ہیں۔ تین نیپالی اور دو فرانسیسی شہری بھی زخمی ہوئے ہیں اور انہیں ہیلی کاپٹر کے ذریعے کٹھمنڈو کے ہسپتالوں میں داخل کیا گیا ہے۔ معمولی زخمی ہونے والے چار دیگر پہاڑ چڑھنے والوں کو بھی جائے وقوعہ سے نکال لیا گیا۔ ایک الگ واقعے میں، دو اطالوی پہاڑ چڑھنے والے، سٹیفانو فیرو ناتو اور الیسینڈرو کیپوٹو 28 اکتوبر کو شدید برفباری کے بعد سے لاپتہ تھے اور وہ ماناسلو علاقے میں ماونٹ پنباری (6,887 میٹر) کے کیمپ میں اپنے خیمے میں مردہ پائے گئے۔
پولیس نے بتایا کہ ان کی لاشیں منگل کو 5,242 میٹر کی بلندی سے برآمد کی گئیں۔ ان کے ساتھ پھنسے ایک اور اطالوی پہاڑ چڑھنے والے ویلٹر پیرالیان کو اتوار کو بچا لیا گیا۔ اسی دوران، نیپال ٹورزم بورڈ نے نیپال کے ہمالیہ میں پہاڑ چڑھنے والوں کی موت پر تعزیتی پیغام جاری کیا ہے۔ بورڈ نے کہا، "برفانی تودے میں ہونے والی اس المناک انسانی ہلاکت پر ہم انتہائی افسردہ ہیں۔ یالنگ ری پہاڑ کے سات متاثرین کے خاندانوں اور دوستوں کے لیے ہماری دلی ہمدردیاں ہیں۔