کٹھمنڈو: اسرائیل میں دو سال پہلے حماس کے حملے کے دوران کئی لوگوں کی جان بچانے والے نیپالی طالب علم کی لاش تل ابیب لائی گئی ہے اور جلد ہی اسے آخری رسومات کے لیے اس کے خاندان کے حوالے کر دیا جائے گا۔ اسرائیل ڈیفنس فورسز (آئی ڈی ایف)نے ایک بیان میں یہ جانکاری  دی ہیں۔ حماس نے بپن جوشی (23) کو سات اکتوبر 2023 کو کیبوٹز الومیم کے ایک پناہ گاہ سے کئی دیگر افراد کے ساتھ اغوا کر لیا تھا۔
آئی ڈی ایف نے منگل کو سوشل میڈیا پر ایک بیان میں کہا کہ بِپن  و کیبوٹز الومیم کے ایک پناہ گاہ سے حماس نے اغوا کر لیا تھا۔ ایسا اندازہ ہے کہ جنگ کے ابتدائی مہینوں کے دوران قید میں ہی اس کا قتل کر دیا گیا۔" آئی ڈی ایف نے کہا کہ وہ متاثرہ کی لاش کو اس کے خاندان کو آخری رسومات کے لیے واپس بھیجنے کی ضروری انتظامات کرے گا۔
بیان کے مطابق، "آئی ڈی ایف (مرنے والوں کے)لواحقین کے تئیں گہری ہمدردی کا اظہار کرتا ہے اور تمام یرغمالیوں کو واپس لانے کے لیے ہر ممکن کوشش جاری رکھے گا، کیونکہ حماس کو معاہدے کے اپنے حصے کو پورا کرنا ہوگا اور تمام یرغمالیوں کو ان کے خاندان کے پاس بھیجنے اور آخری رسومات کے لیے ضروری کوششیں کرنی ہوں گی۔ اسرائیل کے 'لرن اینڈ ارن پروگرام' کے تحت پڑھائی کر رہا جوشی، 16 دیگر نیپالیوں کے ساتھ الومیم کیبوٹز میں کام کر رہا تھا، تبھی حماس نے حملہ کر دیا تھا۔
کٹھمنڈو پوسٹ کی رپورٹ کے مطابق، حملے میں دس نیپالی مارے گئے، پانچ زخمی ہوئے اور ایک بال بال بچ گیا۔ ہمالین ٹائمز کی رپورٹ کے مطابق، جوشی کے دوست وبھوشا ادھیکاری، جو مہلک حملے کے بعد واپس لوٹے تھے، نے اس دوران جوشی کے بہادری والے کام کے بارے میں بتایا تھا۔ وبھوشا نے بتایا کہ جوشی کے کمرے میں دو دستی بم پھینکے گئے اور اس نے دستی بم اٹھا کر حملہ آوروں پر پھینک دیے۔ رپورٹ میں کہا گیا ہے کہ جوشی نے کھیت میں کام کر رہے چھ افراد سمیت 17 کی جان بچائی۔ رپورٹ میں ادھیکاری کے حوالے سے کہا گیا ہے، "اگر وہ اس وقت ہچکچاتا، تو ہم اس وقت زندہ نہ ہوتے۔
کٹھمنڈو پوسٹ کی رپورٹ کے مطابق، جوشی کی موت کی تصدیق اسرائیلی حکام نے کی، جنہوں نے پیر کو ایک ورچوئل میٹنگ میں اسرائیل میں نیپال کے سفیر دھن پرساد پنڈت اور جوشی کے خاندان کو معلومات دی۔ رپورٹ میں کہا گیا ہے کہ جوشی کا خاندان، جو اس کی رہائی کا مطالبہ لے کر اسرائیل اور امریکہ گیا تھا، اب اس کی لاش کو نیپال لائے جانے کا انتظار کر رہا ہے۔