انٹرنیشنل ڈیسک: مالدیپ کے صدر محمد معزو نے جمعرات کو ایک متنازعہ نئے میڈیا بل پر دستخط کرکے اس کی منظوری دے دی ہے، جس میں خلاف ورزی کی صورت میں بھاری جرمانے اور میڈیا اداروں کو عارضی یا مستقل طور پر بند کرنے کی سہولت دی گئی ہے۔ خلاف ورزیوں پر صحافیوں کو 1620امریکی ڈالر اور میڈیا کمپنیوں کو 6,485 امریکی ڈالرتک جرمانہ کیا جاسکتا ہے۔
اس قانون میں تحقیقات تک میڈیا کے لائسنس معطل کرنے، میڈیا لائسنس منسوخ کرنے کے لیے مقدمہ دائر کرنے، یا نئے قانون کی خلاف ورزی کرنے پر نشریات روکنے کے لیے پولیس بھیجنے کا بھی بندوبست کیا گیا ہے۔ صدر کے دفتر نے بتایا کہ Muizzu نے مالدیپ میڈیا اور براڈکاسٹنگ ریگولیشن ایکٹ کی منظوری دی، جسے پارلیمنٹ نے گزشتہ منگل کو بھاری اکثریت سے منظور کیا تھا۔
پارلیمنٹ کے 93 ارکان میں سے 60 برسراقتدار ارکان پارلیمنٹ نے بل کے حق میں ووٹ دیا جبکہ اپوزیشن ارکان کو احتجاج کے دوران ایوان سے باہر نکال دیا گیا۔ نئے قانون کے مطابق صحافیوں کو ملک کے آئین، اسلام، قومی سلامتی، سماجی اقدار کا احترام اور ذاتی وقار اور انسانی حقوق کا تحفظ کرنا ہوگا۔ تعمیل کو یقینی بنانے اور مبینہ جرائم کی تحقیقات کے لیے سات رکنی کمیٹی مقرر کی جائے گی۔