لندن: برطانیہ میں لندن کے شمال مغربی علاقے گولڈرز گرین میں پیر کی علی الصبح ایک سنگین آتشزدگی کا واقعہ سامنے آیا۔ یہاں یہودی برادری کی ہنگامی خدمت کی چار ایمبولینسوں کو آگ لگا دی گئی۔ یہ واقعہ ہائی فیلڈ روڈ علاقے میں پیش آیا جہاں دیر رات اچانک آگ لگنے کی اطلاع ملی۔ معاملے کی اطلاع ملتے ہی میٹروپولیٹن پولیس اور فائر بریگیڈ موقع پر پہنچ گئے۔ پولیس نے بتایا کہ آگ ہٹزولا نامی یہودی ایمبولینس سروس کی گاڑیوں میں لگی تھی۔ فائر بریگیڈ کے عملے نے کافی مشقت کے بعد آگ پر قابو پا لیا۔
اس دوران آس پاس کے لوگوں میں خوف پھیل گیا۔ حفاظت کے پیش نظر قریب کے گھروں کو خالی کرا لیا گیا اور علاقے کی سڑکیں بند کر دی گئیں۔ اطمینان کی بات یہ رہی کہ اس واقعے میں کوئی شخص زخمی نہیں ہوا۔ پولیس کے مطابق آگ کے دوران کچھ دھماکوں کی آوازیں بھی سنائی دیں جو ایمبولینس میں موجود گیس کے ڈبوں کے پھٹنے کی وجہ سے ہوئیں۔ اس سے آگ اور تیزی سے پھیل گئی لیکن وقت رہتے اسے بجھا لیا گیا۔ پولیس نے اس واقعے کو سنجیدگی سے لیتے ہوئے اسے یہودی برادری کے خلاف نفرت سے جڑا جرم قرار دیا ہے۔ جانچ شروع کر دی گئی ہے اور افسران نگرانی کے کیمروں کی تصویروں اور سماجی رابطے کی ویڈیوز کی مدد سے ملزمان کی شناخت کرنے کی کوشش کر رہے ہیں۔
مقامی پولیس افسر سارا جیکسن نے کہا کہ ابتدائی جانچ میں تین مشتبہ افراد کی تلاش کی جا رہی ہے تاہم ابھی تک کسی کی گرفتاری نہیں ہوئی۔ انہوں نے لوگوں سے اپیل کی ہے کہ اگر کسی کے پاس اس واقعے سے جڑی کوئی معلومات ہیں تو وہ پولیس سے رابطہ کرے۔ اس واقعے کے بعد علاقے میں یہودی برادری کے درمیان خوف اور تشویش کا ماحول بن گیا ہے۔ پولیس نے یقین دلایا ہے کہ حفاظت بڑھائی جائے گی۔ اضافی گشت کی جائے گی۔ اور برادری کے رہنماو¿ں کے ساتھ ملاقات کر کے لوگوں کو اعتماد دلایا جائے گا۔