انٹرنیشنل ڈیسک: امریکہ اور چین کے درمیان بڑھتی ہوئی  تجارتی جنگ نے اب  ہندوستانی برآمد کنندگان کے لیے نئے مواقع پیدا کیے ہیں۔ امریکہ نے 1 نومبر 2025 سے چین سے درآمد کی جانے والی اشیاء  پر 100 فیصد اضافی محصول لگانے کا اعلان کیا ہے، جس سے کل محصول کی شرح تقریبا 130 فیصد تک پہنچ جائے گی۔ یہ اقدام چین کے نایاب معدنیات کی برآمدات پر سخت قوانین کے جواب میں لیا گیا ہے۔ یہ معدنیات امریکی دفاع، الیکٹرک گاڑیوں اور صاف توانائی کی صنعتوں کے لیے انتہائی اہم ہیں۔
ماہرین کا ماننا ہے کہ اس اعلی محصول کی وجہ سے امریکی بازار میں چینی اشیا ء مہنگی ہو جائیں گی اور  ہندوستانی  برآمد کنندگان کے لیے مواقع بڑھ جائیں گے۔ ہندوستان  نے 2024-25 میں امریکہ کو 86 ارب ڈالر کی برآمدات کی ہیں۔ کپڑے، کھلونے، زیورات، الیکٹرانک سامان اور صنعتی مصنوعات جیسے شعبے اس موقع سے خاص طور پر فائدہ اٹھا سکتے ہیں۔ ہندوستانی  برآمدی تنظیموں کے فیڈریشن کے صدر ایس سی رلہن نے کہا کہ امریکہ کی جانب سے چین پر اعلی محصولات عائد کرنے سے طلب  ہندوستان  کی طرف منتقل ہوگی۔ یہ ہمارے برآمد کنندگان کے لیے بڑا موقع ہے۔ ایک کپڑے کے برآمد کنندہ نے کہا کہ اس سے امریکی بازار میں ہندوستانی  مصنوعات کی مسابقت بڑھ جائے گی۔
امریکہ کا اعلان چین کی طرف سے نایاب معدنیات کی برآمدات پر سخت قوانین نافذ کرنے کے بعد کیا گیا۔ چین نے اس اقدام کے ذریعے امریکہ کو متاثر کرنے کی کوشش کی تھی۔ امریکی تجارتی ماہرین کا کہنا ہے کہ ہندوستانی  مصنوعات کو اب امریکی بازار میں مسابقت کا فائدہ ملے گا۔ کھلونا صنعت کے برآمد کنندہ منو گپتا نے کہا کہ امریکہ میں چینی اشیاء مہنگی ہونے کی وجہ سے ہماری اشیاء  سستی اور مسابقتی ہو جائیں گی۔ یہ ہم سب کے لیے موقع ہے۔ تاہم یہ صورتحال ہندوستان کے لیے مواقع فراہم کرتی ہے، مگر ماہرین کا کہنا ہے کہ امریکہ اور چین کے درمیان تجارتی غیر یقینی صورتحال کے دوران ہندوستان کو محتاط رہنا چاہیے۔ گلوبل ٹریڈ ریسرچ انسٹی ٹیوٹ (GTRI) نے انتباہ کیا ہے کہ امریکی پالیسیوں میں اچانک تبدیلیاں برآمد کنندگان کے لیے خطرات پیدا کر سکتی ہیں۔