پیرس: فرانس کے دارالحکومت پیرس میں پراسیکیوٹرز نے بچوں کے جنسی مواد (چائلڈ پورنوگرافی) اور ڈیپ فیک سمیت کئی مبینہ جرائم کی ابتدائی تحقیقات کے تحت ایلن مسک کے سوشل میڈیا پلیٹ فارم 'ایکس' کے فرانس میں واقع دفاتر پر منگل کو چھاپہ مارا۔ اس سلسلے میں جاری بیان میں کہا گیا کہ گزشتہ سال جنوری میں پراسیکیوٹر کے دفتر کی سائبر کرائم یونٹ نے تحقیقات شروع کی تھی۔ یہ یونٹ بچوں کو یرغمال بنانے اور ان کی فحش تصاویر پھیلانے، اس سے متعلق ڈیپ فیک، انسانیت کے خلاف جرائم اور ایک منظم گروپ کے حصے کے طور پر 'آٹومیٹڈ ڈیٹا پروسیسنگ سسٹم' میں ہیر پھیر اور دیگر جرائم میں مبینہ سازش کی تحقیقات کر رہی ہے۔
بیان کے مطابق، پراسیکیوٹرز نے ایلن مسک اور 'ایکس' کی 2023 سے 2025 تک چیف ایگزیکٹو آفیسر رہنے والی لنڈا یاکارینو سے رضاکارانہ طور پر پوچھ گچھ کے لیے درخواست کی ہے، جس کے لیے 20 اپریل کی تاریخ مقرر کی گئی ہے۔ اس سلسلے میں 'ایکس' کے ایک ترجمان نے تبصرہ کے لیے کی گئی درخواست پر فوری جواب نہیں دیا۔ پیرس پراسیکیوٹر کے دفتر نے 'ایکس' پر چھاپے کی تصدیق کی۔ اس نے کہا کہ وہ اس پلیٹ فارم کو چھوڑ رہا ہے اور 'فالوورز' سے بھی اپیل کی ہے کہ وہ کسی دوسرے سوشل میڈیا پلیٹ فارم سے منسلک ہوں۔
پراسیکیوٹرز نے ایک بیان میں کہا، اس مرحلے پر، تحقیقات ایک مثبت سوچ پر مبنی ہیں، جس کا مقصد یہ یقینی بنانا ہے کہ 'ایکس' فرانسیسی قانون کی پابندی کرے، کیونکہ یہ ملک کی حدود کے اندر کام کرتا ہے۔ یہ تحقیقات سب سے پہلے ایک فرانسیسی پارلیمان کے رکن کی رپورٹ کے بعد شروع کی گئی تھی، جس میں الزام لگایا گیا تھا کہ 'ایکس' پر موجود جانبدار الگورتھم کے ذریعے ایک 'آٹومیٹڈ ڈیٹا پروسیسنگ سسٹم' کے کام کو متاثر کیے جانے کا امکان ہے۔ بیان میں کہا گیا کہ بعد میں اضافی رپورٹس کے بعد اس کا دائرہ مزید بڑھ گیا، جس میں کہا گیا کہ 'ایکس' کے اے آئی چیٹ بوٹ گروک نے مبینہ طور پر یہودی نسل کشی سے انکار کیا اور جنسی مواد سے متعلق ڈیپ فیک پھیلایا۔