لاس اینجلس: میٹا اپریل کے اوائل میں امریکہ اور آسٹریلیا کے صارفین کے لیے 'فیس بک نیوز' فیچر کو ختم کرنے کا ارادہ رکھتی ہے کیونکہ کمپنی خبروں اور سیاست پر کم زور دینا چاہتی ہے۔ یہ فیچر گزشتہ سال برطانیہ، فرانس اور جرمنی میں بند کر دیا گیا تھا۔ 'فیس بک نیوز' ٹیب کو 2019 میں لانچ کیا گیا تھا اور اس میں قومی اور بین الاقوامی خبر رساں اداروں کے ساتھ ساتھ چھوٹی اور مقامی اشاعتوں کی خبریں بھی شامل ہیں۔
میٹا کا کہنا ہے کہ صارفین اب بھی نیوز آرٹیکلز کے لنکس دیکھ سکیں گے، اور نیوز آرگنائزیشنز اب بھی دیگر افراد یا اداروں کی طرح اپنی خبریں پوسٹ کر سکیں گی اور ویب سائٹ کو فروغ دے سکیں گی۔ میٹا نے اپنے پلیٹ فارم پر غلط معلومات کو ہینڈل کرنے پر پچھلے کچھ سالوں میں تنقید کا سامنا کرنے کے بعد خبروں اور سیاسی مواد کو کم کرنے کا فیصلہ کیا ہے۔
میٹا کے ترجمان ڈینی لیور نے کہا کہ یہ اعلان سیاسی مواد کو منظم کرنے کے ہمارے سالوں کے کام کی توسیع ہے۔ یہ اس بات پر مبنی ہے کہ لوگ ہم سے کیا چاہتے ہیں۔ میٹا نے یہ بھی کہا کہ 'نیوز' ٹیب اس کے 'فیکٹ چیک' نیٹ ورک اور غلط معلومات کا جائزہ لینے کے طریقے کو متاثر نہیں کرے گا۔ تاہم، غلط معلومات اب بھی کمپنی کے لیے ایک چیلنج بنی ہوئی ہیں جب کہ امریکہ میں صدارتی انتخابات کا عمل جاری ہے۔