نیشنل ڈیسک:  بلوم برگ کی ایک رپورٹ کے مطابق ہندوستان کے قومی سلامتی کے مشیر اجیت ڈوبھال نے امریکہ کے وزیر خارجہ مارکو روبیو سے صاف لفظوں میں کہا کہ صدر ڈونالڈ ٹرمپ ہندوستان کو دھمکا یا دبا نہیں سکتے۔ انہوں نے یہ بھی کہا کہ اگر ضرورت پڑی تو نئی دہلی ٹرمپ کی مدت ختم ہونے تک بھی انتظار کرنے کو تیار ہے، لیکن دباؤ میں آ کر کوئی خراب تجارتی معاہدہ نہیں کرے گی۔
ڈوبھال کا ستمبر میں واشنگٹن کا دورہ کیوں ہوا
اجیت ڈوبھال  ستمبر کے آغاز میں واشنگٹن گئے تھے۔ یہ دورہ ایسے وقت ہوا جب وزیر اعظم نریندر مودی نے چین میں روسی صدر ولادیمیر پوتن اور چینی صدر شی جن پنگ سے ملاقات کی تھی۔ اس وقت ہندوستان اور امریکہ کے تعلقات میں کافی کشیدگی تھی۔ بلوم برگ کے مطابق ڈوبھال  کا مقصد امریکہ کے ساتھ بڑھتی ہوئی کشیدگی کو کم کرنا اور تجارتی بات چیت کو دوبارہ پٹری پر لانا تھا۔ نئی دہلی کے حکام نے بتایا کہ ڈوبھال  کا پیغام صاف تھا کہ ہندوستان ٹکراؤ  نہیں چاہتا لیکن جھک کر بھی سودا نہیں کرے گا۔
ڈوبھال  نے روبیو سے کیا کہا
میٹنگ کے دوران اجیت ڈوبھال نے روبیو سے کہا کہ ہندوستان کو ٹرمپ یا ان کے سینئر حکام کی جانب سے  ڈرایا نہیں جا سکتا۔ ہندوستان پہلے بھی مشکل امریکی حکومتوں سے نمٹ چکا ہے۔ نئی دہلی عزت دار اور متوازن معاہدہ چاہتی ہے، دبا ؤ والا نہیں۔
اگست میں ٹرمپ کا ہندوستان پر بڑا حملہ
اس میٹنگ سے کچھ پہلے اگست میں ٹرمپ نے ہندوستان پر سخت اقتصادی حملہ کیا تھا۔ انہوں نے ہندوستانی مصنوعات پر 50 فیصد ٹیرف لگا دیا تھا۔ عوامی طور پر ہندوستان کی تجارتی پالیسیوں پر تنقید کی تھی اور روس سے تیل خریدنے پر بھی ہندوستان کو نشانہ بنایا تھا۔ اس سے دونوں ملکوں کے تعلقات بہت کشیدہ ہو گئے تھے۔
ڈوبھال  کی کوشش کامیاب ہوئی، مودی ٹرمپ بات چیت بڑھی
بلوم برگ کے مطابق ڈوبھال  کی مداخلت کا اثر دکھائی دیا۔ سولہ ستمبر کو ٹرمپ نے وزیر اعظم مودی کو ان کی سالگرہ پر فون کیا۔ ٹرمپ نے مودی کی تعریف کرتے ہوئے کہا کہ وہ شاندار کام کر رہے ہیں۔ سال کے آخر تک دونوں رہنماؤں نے کل پانچ بار بات کی۔ آہستہ آہستہ تجارتی معاہدے کی بنیاد تیار ہوئی۔
نیا تجارتی معاہدہ، کیا طے ہوا
پیر کے دن ٹرمپ نے اعلان کیا کہ ہندوستان کے ساتھ نیا تجارتی معاہدہ ہو گیا ہے۔ اس کے تحت ہندوستان پر امریکی ٹیرف 25 فیصد سے کم کر کے 18 فیصد کر دیا گیا۔ روس سے تیل خریدنے پر لگایا گیا تعزیری محصول ختم کر دیا گیا۔ ٹرمپ نے یہ بھی دعوی کیا کہ ہندوستان نے بدلے میں امریکہ سے پانچ سو ارب ڈالر کا سامان خریدنے پر اتفاق کیا ہے۔ وینزویلا سے تیل خریدنے پر غور کرنے کی بات کہی ہے اور امریکی درآمدات پر ٹیرف صفر کرنے کا وعدہ کیا ہے۔ تاہم ابھی تک کسی بھی فریق نے سرکاری دستاویزات جاری نہیں کیں۔
ہندوستان کی حکمت عملی، ٹرمپ عارضی، تعلق مستقل
بلوم برگ کی رپورٹ کہتی ہے کہ نئی دہلی کا ماننا ہے کہ ٹرمپ ایک عارضی دور ہیں لیکن امریکہ ایک طویل مدتی شراکت دار ہے۔ ہندوستان کو امریکی سرمایہ، ٹیکنالوجی اور فوجی تعاون کی ضرورت ہے۔ خاص طور پر چین کا مقابلہ کرنے اور سن 2047 تک ترقی یافتہ ملک بننے کے ہدف کے لیے امریکہ اہم ہے۔
تعلقات میں دراڑ پہلے کیسے پڑی
اس سال مئی میں ٹرمپ نے دعوی کیا تھا کہ انہوں نے ہندوستان اور پاکستان کے درمیان چار دن تک چلنے والے تنازعے کو حل کرایا۔ ہندوستانی فوج اور وزیر اعظم مودی نے اس دعوے کو مسترد کر دیا تھا۔ اس کے بعد مودی نے ٹرمپ کی وائٹ ہاؤس دعوت بھی رد کر دی تھی، جب ٹرمپ نے پاکستانی قیادت کو مدعو کیا تھا۔
نئے امریکی سفیر سے امیدیں بڑھیں
دسمبر میں امریکہ کے نئے سفیر سرجیو گور ہندوستان آئے۔ انہیں ٹرمپ اور روبیو دونوں کا قریبی سمجھا جاتا ہے۔ انہوں نے بار بار کہا کہ ہندوستان اور امریکہ کا تعلق بہت اہم ہے۔ ان کی تقرری سے تعلقات میں نئی توانائی آئی ہے۔