انٹرنیشنل ڈیسک: مشرق وسطیٰ میں جاری جنگ کے درمیان ایران نے امریکہ کو ایک بار پھر سخت وارننگ دی ہے۔ ایران کی پارلیمنٹ کے اسپیکر محمد باقر قالیباف نے کہا ہے کہ تہران خطے میں امریکی سرگرمیوں پر قریب سے نظر رکھے ہوئے ہے اور کسی بھی اشتعال انگیزی کا سخت جواب دیا جائے گا۔ قالیباف نے امریکہ پر الزام لگایا کہ اس کے فوجی نیتن یاہو کے اشارے پر چل رہے ہیں۔ ان کا کہنا تھا کہ امریکی فوجی نیتن یاہو کی غلط سوچ کا شکار ہو چکے ہیں۔ جو غلطیاں بڑے جرنیلوں نے کی ہیں ان کا خمیازہ اب فوجیوں کو بھگتنا پڑ سکتا ہے۔

انہوں نے صاف لفظوں میں وارننگ دی۔ ہماری زمین کے دفاع کے عزم کو مت آزماو۔ یہ بیان ایسے وقت میں آیا ہے جب خطے میں امریکی فوجی سرگرمیاں مسلسل بڑھ رہی ہیں۔ اطلاعات کے مطابق امریکہ محکمہ دفاع کے ذریعے82ویں فضائی ڈویژن کے فوجیوں کو مشرق وسطیٰ بھیجنے کی تیاری کر رہا ہے۔ بتایا جا رہا ہے کہ قریب 1500 فوجیوں کی تعیناتی ہو سکتی ہے۔ یہ پیش رفت ڈونالڈ ٹرمپ کے اس دعوے کے بالکل برعکس ہے جس میں انہوں نے کہا تھا کہ امریکہ اور ایران کے درمیان بات چیت جاری ہے اور جنگ جلد ختم ہو سکتی ہے۔ ٹرمپ نے یہاں تک دعویٰ کیا کہ امریکہ نے جنگ جیت لی ہے اور ایران مکمل طور پر کمزور ہو چکا ہے۔
تاہم ایران نے ان دعوو¿ں کو مکمل طور پر مسترد کر دیا ہے۔ ایرانی فوجی ترجمان نے طنز کرتے ہوئے کہا کہ امریکہ خود سے ہی بات چیت کر رہا ہے اور اس کی حکمت عملی کی طاقت اب شکست میں بدل چکی ہے۔ اس دوران ایران نے سچا وعدہ چار کے تحت میزائل حملے جاری رکھے ہیں جس سے صاف ہے کہ زمینی سطح پر کشیدگی کم ہونے کے بجائے مزید بڑھ رہی ہے۔ فی الحال حالات انتہائی سنگین بنے ہوئے ہیں۔ ایک طرف امریکہ بات چیت کی بات کر رہا ہے تو دوسری طرف ایران مسلسل فوجی وارننگیں اور حملے کر رہا ہے۔ اس سے یہ اشارہ ملتا ہے کہ فی الحال امن کی راہ آسان نہیں ہے۔