غزہ: جنوبی غزہ کی پٹی کے شہر رفح میں اتوار کی رات تین رہائشی عمارتوں پر اسرائیلی فضائی حملوں میں کم از کم 15 فلسطینی ہلاک ہوگئے۔ یہ اطلاع فلسطین کی سرکاری خبر رساں ایجنسی وفا نے پیر کو دی۔ مقامی ذرائع نے بتایا کہ کئی دوسرے لوگ اب بھی ملبے تلے دبے ہوئے ہیں اور سول ڈیفنس کی ٹیمیں انہیں بچانے کے لیے کام کر رہی ہیں۔
حماس کے زیر انتظام وزارت صحت کی طرف سے جاری کردہ ایک بیان کے مطابق گزشتہ 24 گھنٹوں کے دوران اسرائیلی فوج کی کارروائیوں میں 66 فلسطینی ہلاک اور 138 زخمی ہوگئے۔ بیان کے مطابق 7 اکتوبر 2023 کو اسرائیل فلسطین تنازع شروع ہونے کے بعد سے اب تک ہلاکتوں کی کل تعداد 34,454 تک پہنچ گئی ہے اور 77,575 افراد زخمی ہوئے ہیں۔
بتادیں کہ رفح پر حملے سے ایک روز قبل اسرائیل نے حماس کو خبردار کیا تھا کہ اس کے پاس یرغمالی معاہدہ کرنے کا آخری موقع ہے۔ اگر حماس معاہدے پر راضی نہیں ہوتا تو اس کی افواج رفح شہر پر حملہ کر دیں گی۔ ادھر حماس نے ہفتے کے روز کہا کہ وہ غزہ میں جنگ بندی کے لیے اسرائیل کی نئی تجویز کا جائزہ لے رہاہے۔