نیو یارک:  جنسی جرائم کے ملزم جیفری ایپسٹین سے متعلق دستاویزات کو عوام کے سامنے لانے کے لیے امریکی محکمہ انصاف کی جانب سے بنائے گئے ویب پیج سے کم از کم 16 فائلیں غائب ہو گئی ہیں۔ ان فائلوں میں امریکہ کے صدر ڈونالڈ ٹرمپ کی ایک تصویر بھی شامل ہے۔ یہ فائلیں ایک دن پہلے ہی شیئر کی گئی تھیں، لیکن اب وہ ویب پیج پر دستیاب نہیں ہیں۔ اس معاملے میں نہ تو حکومت کی جانب سے کوئی وضاحت دی گئی ہے اور نہ ہی عوام کو کوئی اطلاع فراہم کی گئی ہے۔
یہ فائلیں جمعہ کے روز ویب پیج پر موجود تھیں، لیکن ہفتہ کے دن ان تک رسائی روک دی گئی۔ ان میں برہنہ خواتین کو دکھانے والی پینٹنگز کی تصاویر بھی شامل تھیں۔ ان میں سے ایک تصویر میں ایک الماری اور درازوں میں رکھی ہوئی تصاویر دکھائی دے رہی تھیں۔ اسی تصویر میں ایک دراز کے اندر دیگر تصاویر کے درمیان ڈونالڈ ٹرمپ، جیفری ایپسٹین، امریکہ کی خاتون اول میلانیہ ٹرمپ اور ایپسٹین کی ساتھی گزلین میکسویل کی تصویر بھی موجود تھی۔