واشنگٹن: مشرق وسطیٰ میں امریکہ اور ایران کے درمیان کشیدگی ایک بار پھر عروج پر پہنچتی دکھائی دے رہی ہے۔ سیٹلائٹ تصاویر سے انکشاف ہوا ہے کہ امریکہ نے قطر، اردن اور سعودی عرب میں قائم اپنے اہم فوجی اڈوں پر لڑاکا طیاروں، ٹرانسپورٹ طیاروں اور میزائل دفاعی نظام کی تعداد تیزی سے بڑھا دی ہے۔ ماہرین اسے ایران کے جوہری پروگرام پر ممکنہ حملے یا ایران کی جوابی کارروائی سے بچاو کی تیاری قرار دے رہے ہیں۔ پلینیٹ لیبز اور رائٹرز کی جانب سے جاری تصاویر میں جنوری سے فروری 2026 کے درمیان امریکی اڈوں پر بڑی تبدیلیاں واضح طور پر نظر آ رہی ہیں۔ یہ فوجی سرگرمی ایسے وقت میں بڑھی ہے جب امریکی صدر ڈونالڈ ٹرمپ ایران پر نئی نیوکلیئر ڈیل کے لیے دباوڈال رہے ہیں۔
العدید ایئر بیس، قطر۔
قطر کے دوحہ میں واقع العدید ایئر بیس، جو امریکی سینٹرل کمانڈ کا ہیڈکوارٹر ہے، وہاں 17 جنوری سے یکم فروری کے درمیان طیاروں کی تعداد میں نمایاں اضافہ دیکھا گیا ہے۔ یہاں موبائل پیٹریاٹ میزائل لانچرز بھی تعینات کیے گئے ہیں، جن کا مقصد ایران کی بیلسٹک میزائلوں سے دفاع بتایا جا رہا ہے۔ العدید وہی بیس ہے جس پر پہلے بھی ایران جوابی حملہ کر چکا ہے۔

مووفق سالتی ایئر بیس، اردن۔
اردن کے مووفق سالتی ایئر بیس پر 25 جنوری سے 2 فروری کے درمیان درجنوں ایف 15 ای لڑاکا جیٹ، اے 10 گراونڈ اٹیک طیارے اور ایم کیو 9 ریپر ڈرون پہنچائے گئے ہیں۔ یہ بیس ایران کے نسبتاً قریب ہے، جس سے اس کی اسٹریٹجک اہمیت اور بڑھ جاتی ہے۔
پرنس سلطان ایئر بیس، سعودی عرب۔
سعودی عرب کے پرنس سلطان ایئر بیس پر سی 5 گلیکسی اور سی 17 گلوب ماسٹر جیسے بھاری ٹرانسپورٹ طیارے دیکھے گئے ہیں، جن کا استعمال بڑے پیمانے پر ہتھیار، میزائل نظام اور فوجی ساز و سامان لے جانے میں کیا جاتا ہے۔ اس کے علاوہ عمان اور ڈیاگو گارشیا جیسے اسٹریٹجک مقامات پر بھی امریکی طیاروں کی موجودگی بڑھنے کے اشارے ملے ہیں۔ مجموعی طور پر لڑاکا جیٹ، ٹینکر اور فضائی دفاعی نظام کی تعیناتی میں تیزی آئی ہے۔

ٹرمپ کی وارننگ اور ایران کی تیاری۔
امریکی صدر ٹرمپ ایران سے جوہری معاہدہ چاہتے ہیں، لیکن ساتھ ہی اس کے بیلسٹک میزائل پروگرام پر بھی پابندی کا مطالبہ کر رہے ہیں۔ ایران نے اسے اپنی خودمختاری کا معاملہ قرار دیتے ہوئے صاف انکار کر دیا ہے۔ ٹرمپ پہلے ہی خبردار کر چکے ہیں کہ اگر ڈیل نہ ہوئی تو اگلا حملہ بہت براہوگا۔ ادھر ایران بھی ممکنہ حملے کے خدشے کے پیش نظر اپنی جوہری تنصیبات کو مضبوط بنا رہا ہے۔ رپورٹس کے مطابق ایران اصفہان جیسے مقامات پر سرنگوں کو مٹی سے ڈھانپ رہا ہے اور ڈھانچوں کو مزید محفوظ بنا رہا ہے۔
ماہرین کی رائے۔

• ماہرین کا ماننا ہے کہ اتنی مہنگی اور وسیع فوجی تعیناتی صرف مشق نہیں ہو سکتی۔
• یہ ایران پر حملے کی براہ راست تیاری ہو سکتی ہے۔
• یا پھر ایران کی جوابی میزائلوں سے دفاع کی حکمت عملی۔

ساتھ ہی اسے سفارت کاری میں دباو ڈالنے کی حکمت عملی بھی سمجھا جا رہا ہے۔
اگرچہ مذاکرات کے راستے کھلے ہیں، لیکن دونوں فریقوں کی فوجی تیاریاں یہ اشارہ دے رہی ہیں کہ حالات انتہائی نازک ہیں۔ اگر حملہ ہوا تو یہ پورے مشرق وسطیٰ کو علاقائی جنگ کی آگ میں جھونک سکتا ہے۔