ٹوکیو: امریکی صدر ڈونالڈ ٹرمپ نے منگل کو ایشیا کے دورے کے دوسرے دن جاپان کی پہلی خاتون وزیراعظم سانے تاکائیچی سے ملاقات کی۔ ملاقات کے آغاز میں ٹرمپ نے مسکراتے ہوئے کہا،یہ تو بہت مضبوط ہینڈشیک ہے!، جس سے ماحول خوشگوار ہو گیا۔
اس رسمی ملاقات میں دونوں رہنماوں نے دو طرفہ تجارت، حفاظتی تعاون اور نایاب معدنیات کی فراہمی پر دو اہم معاہدے کیے۔ پہلا معاہدہ "نیا سنہری دور" کے نام سے جانا جا رہا ہے، جس کے تحت جاپان امریکہ میں 550 ارب ڈالر کی سرمایہ کاری کرے گا اور اس کے بدلے میں 15 فیصد شرحِ محصول نافذ کی جائے گی۔
دوسرا معاہدہ اہم اور نایاب معدنیات کی سپلائی چین کو مضبوط کرنے پر مرکوز ہے، تاکہ الیکٹرانکس اور جدید تکنیکی صنعتوں میں انحصار کم کیا جا سکے۔ ملاقات کے دوران وزیراعظم تاکائیچی نے کہا کہ وہ جاپان-امریکہ اتحاد کا نیا سنہری دور" شروع کرنا چاہتی ہیں۔ انہوں نے ٹرمپ کی تھائی لینڈ-کمبوڈیا تنازع میں امن قائم کرنے کی کوششوں کی بھی تعریف کی اور اسے تاریخی کامیابی قرار دیا۔
ٹرمپ کا یہ دورہ ملائشیا میں آ سیان (ASEAN) کانفرنس میں شرکت اور کمبوڈیا-تھائی لینڈ امن معاہدے پر دستخط کے بعد ہوا ہے۔
ٹوکیو پہنچنے سے پہلے ٹرمپ نے جاپان کے بادشاہ ناروہیتو سے بھی ملاقات کی تھی۔ ٹوکیو کے اکاساکا پیلس میں ہونے والی رسمی تقریب میں دونوں رہنماوں نے گارڈ آف آنر کا معائنہ کیا اور حکام سے ملاقات کی۔ جاپانی وفد نے امریکہ کے ساتھ اقتصادی اور اسٹریٹجک شراکت کو مزید گہرا کرنے کے عزم کو دہرایا۔
اس کے علاوہ، ٹرمپ کے ساتھ امریکی وفد میں وزیرِ خارجہ مارکو روبیو، وزیرِ خزانہ اسکاٹ بیسینٹ، وزیرِ تجارت ہاورڈ لوٹ نک، تجارتی نمائندہ، اور پریس سیکرٹری کیرولائن لیوٹ شامل تھے۔ ٹرمپ کا یہ ایشیا کا دوسرا پڑاو ہے۔ وہ اب سیول (جنوبی کوریا) جائیں گے، جہاں اے پی ای سی (APEC) سربراہی اجلاس میں تجارت، سلامتی اور علاقائی تعاون پر تبادلہ خیال ہو گا۔