انٹرنیشنل ڈیسک: کینیڈا کے جنگلات میں لگی آگ سے اٹھنے والا دھواں بدھ کو امریکہ کے مشرقی ساحل اور وسط مغربی خطے تک پہنچ گیا، جس سے نیویارک شہر میں ہوا کا معیار خراب ہوگیا۔ IQAIR کے اعداد و شمار سے پتہ چلتا ہے کہ بدھ کے روز نیویارک شہر میں آلودگی کی سطح دنیا کے بڑے شہروں سے زیادہ تھی اور اس کی آب و ہوا ہندوستان کی راجدھانی دہلی کی آب و ہوا سے بھی بدتر ہو گئی تھی۔

بدھ کے روز نیو یارک شہر کو دھوئیں کا غبار اس قدر چھایا رہا کہ شہر کی مشہور اسکائی لائن  آنکھوں سے اوجھل ہو گئی ۔  کئی موسمی مراکز کا کہنا ہے کہ زیادہ تر مقامات پر مرئیت ایک میل سے بھی کم تھی۔ 'IQAR' کے مطابق، بدھ کو نیویارک شہر کی ہوا کا معیار دنیا کے تمام بڑے شہروں  کے مقابلے سب سے اونچی سطح پر تھا ،  اور اس نے  فضائی آلودگی کی سطح کے معاملے میں دہلی کو بھی پیچھے چھوڑ دیا۔ حال ہی میں جاری ہونے والی گلوبل ایئر کوالٹی رپورٹ میں ہندوستان کو 2022 میں دنیا کا آٹھواں سب سے زیادہ آلودہ ملک قرار دیا گیا تھا۔  چاڈ، عراق، پاکستان، بحرین اور بنگلہ دیش اس فہرست میں بالترتیب پہلی پانچ پوزیشنوں پر تھے ۔  ماہرین موسمیات نے نیویارک شہر میں باقی ہفتے کے لیے دھواں دار آسمان اور ہوا کے انتہائی خراب معیار کی پیش گوئی کی ہے۔

فیڈرل ایوی ایشن اتھارٹی کے مطابق، دھوئیں کے غبار سے  مرئیت کم ہونے کی وجہ سے نیو جرسی کے نیوارک لبرٹی انٹرنیشنل ائیرپورٹ اور نیو یارک سٹی کے لا گارڈیا ہوائی اڈے پر گراؤنڈ اسٹاپ آرڈر جاری کرنا پڑا ۔ گراؤنڈ اسٹاپ' ہوائی ٹریفک کنٹرول کا ایک پیمانہ ہے، جس کے تحت متعلقہ ہوائی اڈے پر ہوائی جہاز کی نقل و حرکت کو یا تو کم کر دیا جاتا ہے یا روک دیا جاتا ہے۔ نیویارک شہر کے علاوہ ڈیلاویئر کی آب و ہوا میں بھی نمایاں کمی دیکھی گئی۔ بدھ کو شہر میں ہوا کے معیار کا انڈیکس 199 ریکارڈ کیا گیا، جسے غیر صحت بخش سمجھا جاتا ہے۔