نئی دہلی: کانگریس جنرل سکریٹری پرینکا گاندھی نے ہفتہ کے روز الزام لگایا کہ بھارتیہ جنتا پارٹی (بی جے پی) کی حکومت چھتیس گڑھ کے جنگلات وزیر اعظم نریندر مودی کے عزیز صنعتکار گوتم اڈانی کے حوالے کر رہی ہے اور ریاست کے سابق وزیر اعلی بھوپیش بگھیل اس کی سخت مخالفت کر رہے ہیں، اس لیے ان کے خاندان کو سزا دی جا رہی ہے محترمہ پرینکا گاندھی نے آج یہاں کہا کہ مسٹر بگھیل اس مسئلہ کو اسمبلی میں اٹھانے والے تھے لیکن اس سے پہلے ہی ان کی آواز دبانے کے لیے ان کے بیٹے کو گرفتار کر لیا گیا ہے۔ انہوں نے کہا کہ بی جے پی اس طرح کے حربے اپناتی رہتی ہے لیکن کانگریس کے لوگ اس سے ڈرنے والے نہیں ہیں اور وہ اس کی مخالفت کرتے رہیں گے۔
انہوں نے کہا کہ "بی جے پی حکومت نے چھتیس گڑھ کے تمام جنگلات کو اڈانی کے لیے وقف کر دیا ہے۔ پی ای ایس اے قانون اور این جی ٹی کی ہدایات کی خلاف ورزی کرتے ہوئے جنگلات کو تباہ کیا جا رہا ہے۔ سابق وزیر اعلی بھوپیش بگھیل جی اس معاملے کو اسمبلی میں اٹھانے والے تھے۔ انہیں روکنے کے لیے انفورسمنٹ ڈائریکٹوریٹ نے صبح سویرے ان کے گھر پر چھاپہ مارا اور ان کے بیٹے کو گرفتار کر لیا۔
کانگریس جنرل سکریٹری نے کہا، "گزشتہ 11 سالوں میں، ملک اچھی طرح سمجھ چکا ہے کہ یہ عوام کی آواز کو کچلنے اور اپوزیشن کو دبانے کے طریقے ہیں۔ لیکن اس طرح کے ہتھکنڈوں سے سچ کو دبانا اور اپوزیشن کو ڈرانا ممکن نہیں ہے۔ کانگریس کا ہر کارکن بگھیل جی کے ساتھ مضبوطی سے کھڑا ہے۔