نئی دہلی : ریپ ملزم  سابق بھاجپا ودھائیک کلدیپ سنگھ سیگر کو دہلی کی تیس ہزاری کورٹ نے مجرم قرار دیا ہے ۔ بتا دیں کہ کلدیپ سنگھ سینگر پر 2017 میں لڑکی کا اغوا اور عصمت دری کے الزامات ہیں ۔ معاملے میں ایک دیگر خاتون ششی سنگھ پر بھی عدالت نے الزام عاید کئے ہیں ۔ فی الحال ابھی عدالت نے فیصلہ سنایا ہے سزا کا اعلان 19 دسمبر کو کیا جائے گا ۔ 

اس سے پہلے کیمرے کے سامنے چلنے والی کارروائی میں ضلع جسٹس دھرمیندر شرما نے کہا تھا کہ وہ مقدمے میں سی بی آئی اور ملزم فریق کے دلائل سننے کے بعد 16 دسمبر کو فیصلہ سنا سکتے ہیں ۔ 

سپریم کورٹ  کے حکم پر مقدمے کو لکھنؤ سے دہلی منتقل کئے جانے کے بعد جسٹس نے پانچ اگست سے روزنہ مقدمے کی سماعت کی تھی ۔ سینگر پر خاتون کو 2017 میں نابالغ رہتے ہوئے مبینہ طور پر اغوا کر اس کے ساتھ جنسی استحصال کرنے کا الزام ہے ۔ عدالت نے ساتھی ملزم  ششی سنگھ پر بھی الزام طے کئے ہیں ۔  ششی وہ خاتون ہے جو لڑکی کو نوکری دلانے کے بہانے کلدیپ سینگر  کے پاس لے کر گئی تھی جس کے بعد سینگر نے لڑکی کی عصمت دری کی تھی ۔