دہلی کی کیجریوال حکومت نے پورے دہلی میں خواتین کے لئے بس کا کرایہ مفت کردیاہے، ان کے اس کام کو لے کر خواتین میں خوشی کی لہر ہے ۔خواتین کے بعد دہلی حکومت بزرگوں اور طلباء کو بھی بسوں میں مفت سفر کروا سکتی ہے۔وزیر اعلیٰ اروند کیجریوال کا کہنا ہے کہ خواتین کے مفت سفر کی منصوبہ بندی سے ملے تجربے کی بنیاد پر بزرگوں اور طلباء کو بھی اس کے دائرے میں لایا جائے گا۔

منگل کو بھائی دوج پر اپنے ویڈیو پیغام میں اروند کیجریوال نے کہا کہ سارے کام ایک ساتھ پورے نہیں کئے جا سکتے، لیکن دہلی حکومت اس سمت میں آگے کام کرے گی۔دہلی سرکار نے اعلان تو کرلیا ہے مگر اگے کا فیصلہ کب تک کیا جاتا ہے اس پر سب کی نگاہیں ٹکی ہوئی ہیں۔
کیجریوال نے کہا کہ معاشرے کی ساخت اس طرح کی ہے کہ خواتین کو برابری کے مواقع نہیں ملتے۔مثلاً، دہلی میں 11 فیصد کاروباری خواتین ہیں۔مردوں کی تعداد 89 فیصد ہے۔وہیں، میٹرو اور ڈی ٹی سی میں 30-30 فیصد خواتین ہی سفر کرتی ہیں۔

معاشرے کے کچھ لوگ تو کوکھ میں ہی بچے کا پتہ کر لیتے ہیں۔لڑکی ہونے پر وہ اسقاط حمل کرا دیتے ہیں۔کیجریوال نے کہا کہ مفت سفر کی سہولت شروع کرنے سے بچیوں کو تعلیم کا موقع ملے گا۔اس سے خواتین با اختیار ہوں گی۔